amalinks wokungena

Breaking News

Abamabhizimusi, Uhulumende Labezombusazwe Bahlangana Bebonisana Ngezenotho


Umhlangano wokubonisana ngokuthuthukisa umnotho welizwe oweEconomic Outlook Symposium

Ingcwethi kwezombusazwe kanye lohulumende bavumelana ukuba ukuhlanganisa amakhanda kwenhlangothi zonke kuwonalo umnyaka ka 2016, kuqakathekile ukuze kubonisanwe phezu kokungenziwa ukuthuthukisa umnotho welizwe osuwonakele.

Inkokheli zamankampani elizweni,zikhala ngesilinganiso sokulitshumi ekhulwini-10% levy, semali ehlawuliswa labo abangafuni ukulandela okufunwa ngumthetho wokunikeza amandla amankampani kuzizalwane zeZimbabe, bethi bafisa ngabe siyehliswa sibe phansi kokukodwa ekhulwini ukuze angaze aphuma kubhizimusi.

Lokhu ngokunye kokuphume emhlanganweni owenzelwe eweteleni ye Meikles Hotel, ongenwe ngabavele kuhulumende, osomabhizimusi, lengcwethi kwezozomnotho, bebonisana phezu kokungenziwa ukuthuthukisa isimo somnotho kuwonalo umnyaka ka 2016, oqoqwe yinhlanganiso ye Zimbabwe Confederations of Industries – CZI bemanyene labohlangothi oluloba ngezamabhizimusi kuphephandaba le Herald.

Lanxa umphathintambo wezabatsha lokunikezwa kwamandla omnotho kuzulu onsundu owe Indigenisation,etshengise ukuqholoza ngesikhathi esethula umbiko wakhe phezu kokulandelwa komthetho owe Indigenizationa, ucine evuma ukuba kumqoka ukukhulumisana sikhathi sonke, kudingwe indlela ezingathuthukisa umnotho welizwe.

Umkhokheli wenhlanganiso yezamabhizimusi eye CZI, umnumzana Busisa Moyo
Umkhokheli wenhlanganiso yezamabhizimusi eye CZI, umnumzana Busisa Moyo

Umkhokheli wenhlanganiso ye Confederation of Zimbabwe Industries - CZI, umnumzana Busisa Moyo uthi kungumnqondo omuhle lo osekukhulunywa ngawo, kuyikho vele obekusilela kumizamo yokuthuthukisa umnotho welizwe ngoba yilowo lalowo ubesenza okwakhe, kungekho kuxhumana.

Wengeza uMoyo ethi lokhe ziqhubekela phambili ingxoxo phezu kwezinye zeziqondiso, ezikumthetho olawula phezu kokunikezwa kwamandla ezomnotho kuzulu weZimbabwe ethi ngoba abamankampani bekhathazekile ngodaba lwenhlawulo ehlawuliswayo nxa umnini nkampani nxa engawulandelanga, wavumela ukunikezwa kwamandla ezomnotho kuzulu wakuleli, onsundu.

Kuvunyelelwe kulomhlangano ukuba kumqoka ukube lokhe abenhlangothi ezehlukeneyo, baxhumane sikhathi sonke, kutshelanwa amaqiniso kodwa sikhathi sinye bephana amacebo okuthi ilizwe lingathuthukiswa njani.

Abamankampani, osomabhizimusi kanye lengcwethi kwezomnotho bathi kuqakathekile ukuba acace uhulumende, phezu kwalomthetho owe Indigenization, ukuqeda udubo lwemibuzo lokungazwisiswa kwawo.

XS
SM
MD
LG