amalinks wokungena

Breaking News

Umhlangano weAU Summit Uqalisa Okusemthethweni Kwele Equatorial Guinea


Ban Ki-moon

Umhlangano womanyano wamazwe abensundu owe African Union Summit uqalise okusemthethweni ngoLwesine edolobheni leMalabo kwele Equatorial Guinea umgcinisihlalo uDr Nkosazana Dlamini-Zuma ekhuthaza inkokheli yamazwe eAfrica ukuthi agcwalise izithembiso zokusebenzela ukulondoloza ukuthula lokuthuthukisa inhlalakahle kazulu.

UDr Dlamini-Zuma uthi nxa kungela kuthula lokuzinza emazweni awe Africa kawasoze enelise ukuthuthukisa imisebenzi yawo yokulima ukuze uzulu emazweni la athole ukudla kanye lemisebenzi.

Inkokheli yamazwe aweAfrica iyahlangana eMalabo ngenhloso yokugcizelela ukuzinikela kwayo ukusebenzela elakusasa elihle laleli zwekazi phansi kwesihloko esithi 'The Africa we want under Agenda 2063’ okuluhlelo oluzamele luqhutshwe phakathi kweminyaka engamatshumi amahlanu alandelayo njalo oluzakwethulelwa iAU emhlanganweni wayo olandelayo.

Umhlangano weMalabo wenziwa phansi kwesihloko esithi "Agriculture and Food Security" esikhuthaza ukuthuthukiswa kwemisebenzi yokulima ukuze ukudla kufinyelelwe ngumuntu wonke waleli zwekazi.

UDlamini-Zuma uthi abasakhulayo yibo abalinani elikhulu kuleli zwekazi kodwa okudanisayo yikuthi balutshwana kakhulu abalesifiso sokuphatheka emsebenzini wokulima okuvezwa zindlela ezilokhe zisetshenziswa ekulimeni ezakudala ezingakhuthazi ukusetshenziswa kwemitshina yakulezi nsuku yokuthuthukisa ezokulima.

Unobhala jikelele wenhlanganiso yomanyano wamazwe womhlaba umnumzana Ban Ki Moon okhona laye kulumhlangano uthe ulokukhathazeka okukhulu ngempi zomdeni emazweni eAfrica agoqela ele South Sudan ethi lokhu yikho okubuyisela muva inthuthuko yelaleli zwekazi. Wagcizelela inkuthazo kaDlamini-zuma ukuthi leli zwekazi lilakho ukuthuthuka okwamagama nxa zingaphela lezi zimpi okungavulela indlela ukugcwaliswa kweziqondiso zamaMillenium Development Goals zokuqeda indlala lobuyanga kuleli zwekazi.

Wengeze ethi ukuguquka komkhathi lokuphanjaniswa kwawo ngokuvela emazweni athuthukileyo ngokunye okuphazamisa umsebenzi wokulima ezwekazi leAfrica, ngakhoke kumele inkokheli yaleli zwekazi iphakamise ilizwi linye ekukhulumisaneni lamazwe athuthukileyo ngalolu daba. Wathi okudanisayo yikuthi ukuphazamiseka komkhathi kuphatha kubi amazwe eAfrica ngamandla ngoba engela mali yokuvimba lokuhlawulisa labo abaphazamisa lumkhathi.

Lumhlangano wamukele okusemthethweni inkokheli yamazwe esanda kukhethwa emazweni ayo agoqela umongameli omutsha wele Egypt.

XS
SM
MD
LG