Umhlangano weSADC Double Troika owenzelwe eGaborone kweleBotswana ngoLwesibili, awuzange uluthinte udaba lweZimbabwe ngemva kokuba ezinye izizalwane zalelo lizwe eziseBhilithani zicele umongameli Ian Khama weBotswana, onguye umgcinisihlalo wale inhlanganiso ukuthi akhangele izikhalazo zensolo ngombuso okhona okwamanje elizweni.
Kube lokutshengisela eLondon ngenyanga edluleyo ngabenhlanganiso yeZimbabwe Vigil becela umongameli Ian Khama njengomgcinisihlalo weSADC ukuthi akhangele udaba lweZimbabwe.
Kuzikhalazo zabo bakhala ngomumo womnotho, okutshengiswa yikwehluleka kukahulumende ukubhadala izisebenzisi iholo ngesikhathi kanye lokuswelakala kwemali emabhanga, njalo bathi kulokwesaba kokuqonga kodlakela ngesikhathi iZimbabwe ikhangelele ukhetho luka2018.
Kodwa amalunga aweDouble Troika agoqela iBotswana, Zimbabwe, Tanzania, Swaziland, Mozambique kanye leSouth Africa abazange balokothe bathinte udaba lweZimbabwe.
Umhlangano lo ube ubizwe ngesiphangiphangi ukuze uhlaziye okwenzakala kwele Lesotho lokhe kwabulawa owayekhokhela ibutho umnunzana Mamparankwe Mahao nyakenye.
Abanye beZimbabwe abafana lomnunzana Brighton Ndlovu abakade besendaweni yomhlangano weSADC bathi kube lithuba elikhuthiweyo ukuthi labo abeseBotswana batshengise ukukhathazeka ngesimo eZimbabwe hatshi ukulindela labo abesekudeni njengeBhilithani…
“Uma babefuna ukalalelwa kumele babuye endaweni efana layonaleyi. Bonke abongameli bakhona lapha ngakho uma babefuna ukuthi balalelwe kumele babuye endaweni enje”.
Kulombono njalo wokuthi abeZimbabwe abafuqi ngamandla uma indaba zabo zingena kuSADC. UNdlovu uthi iLesotho ifuqa ngamandla okuvezwa ngokubona ngitsho lomfelokazi kaBrigadier Mahao kanye labanye abakhathazekile bebuya bezolinda ngaphandle kwandawo yomnhlangano we SADC.
Khathesi umhlangano lo ulandelwa ngabobonke abeLesotho abakhathazekileyo ngokwenzaka elizweni labo. Yikho okumele kuyenziwe ngabeZimbabwe uma befuna ukufuqa iSADC ukuthi indaba zayo zikhangelwe zilungisiswe.
UMugabe yena ufike ekucineni kulomhlangano ngemva kokuba eyehle indizamtshina izolo ntambama evela eHarare.
Ukhanye ekhathele ekuhambeni kwakhe kodwa utshayelwe ukhwelo okwedlula abanye omongameli ngesikhathi efika endaweni ebisenzelwa lumhlangano.
