Umhlangano weSadc Troika oqoqwe ngenjongo yokuzama ukulungisisa inkinga zeZimbabwe uqale ngoLwesine kweleZambia.
Ekuvulweni kwalumhlangano uMongameli Rupiah Banda weleZambia, engumgcinisihlalo njalo weSadc Troika uxwayise abakhokheli bamazwe asezwekazi leAfrica ukuba bavumele inguquko efunwa ngabantu. Uthe ukuncindezela uzulu kulakho ukubangela umvukela.
UBanda wengeze wathi abakhokheli laba kumele bafunde kungxabangxoza enzakale emazweni asenyakatho yeAfrica agoqela iTunisia, iEgypt leLibya lapho okube lomvukela khona uzulu ekhonona ngokubuswa kubi.
Inengi lithi amazwi kaBanda la ebeqondiswe kuMongameli Robert Mugabe yena oyetheswa umlandu wokuncidezela uzulu lokubusa kubi.
Abakhokheli bamandla akuhulumende womanyano ababalisa uMugabe, uMnu Arthur Mutambara, uMnu Morgan Tsvangirai kanye loMnu Welshman Ncube baphathekile labo kulumhlangano.
Umhlangano lo uzahlaziya njalo okwenzakala kwamanye amazwe agoqela iSwaziland. Ingcwethi ecubungula ezombusazwe uMnu Mlamuli Nkomo uthe uyawajabulela kakhulu amazwi kaBanda.
