amalinks wokungena

Breaking News

Umhlangano Wezenotho Oqoqwe ngabeSAPES Ugqitshwa eHarare


Dumiso Dabengwa
Uhulumende uthi uzimisele ukuvuselela indlela zokukhulumisana phakathi kwezisebenzi, abaqatshi laye eze Tripatite Negations Forum ( NTF ), eziphazanyiswe ngesikhathi eleZimbabwe lisebunzimeni kwezenotho lezombusazwe ngomnyaka ka 2008. Ngakwelinye icele ingcwethi kwezomnotho zona ziveza ukuba akula nguquko ezaba khona kwezomnotho elizweni ngaphandle kokuba uhulumende ehlukane lomkhuba wokuguqula imithetho lenhlelo okumele zilandelwe kodwa engenelisi ukulandela ngokugcweleyo iziqondiso zenhlelo ezijonge ukuthuthukisa umnotho welizwe.

Emhlanganweni wensuku ezimbili, ogqitshwe ngoLwesibili, wokubonisana phezu kokungenziwa ukuvuselela umnotho welizwe owenzelwe e Harare International Conference Centre, kuvele sobala ukuba sikhona isidingo sokukhulumisana kwenhlangothi zonke zempilo lapho kuhlelwa inhlelo ezihlose ukuthuthukisa umnotho.

Umsekeli womphathintambo wezisebenzi umnumzana Tongai Muzenda utshele lumhlangano ukuba uhulumende uzimisele ukuthuthukisa indlela zokukhulumisana ukuze kuthuthukiswe isimo somnotho welizwe esingesihle okwamanje.

Kuthi omunye wabasekeli womkhokheli wenhlanganiso ye Zimbabwe Congress of Trade Unions umnumzana Mutasa uthi kumqoka ukuba uhulumende aqale athole imibono kazulu lazo zonke inhlangothi ngaphambilini kokwethula inhlelo zakhe. Esithi kumele ihlonitswe imibono kazulu kanye lelungelo lakhe hatshi lokho osekusenzakala lapho uzulu umane aphiwe okuvelela kuhulumende okufana lohlelo lweZIMASSET.

Ingcwethi kwezomnotho ebezikulomhlangano oqoqwe ngabe SAPES Trust besebenzelana leye National Endowment for Democracy-NED kanye le Zmbabwe Union of Journalists-ZUJ zikhuthaze uhulumende ukuqakathekisa ukusungulwa kwenhlelo eziphathisa ukuvuselela umnotho ngelihlo elikhangelwa isikhathi eside.

Omunye wabasekeli bakasibalukhulu webhanga elikhulu lelizwe ele Reserve Bank of Zimbabwe u Dr Khuphukile Mlambo ugcizelele ngokuthi ngaphandle kokuzimisela kwenhlangothi zonke ukukhulumisana lokubonisana ngendlela ezingavuselela umnotho welizwe, uzaqhubeka uncipha,usiba mubi. Ukhuthaza uzulu uMlambo ukuba laye angagoqi izandla abukele nje kodwa asukumele phezulu aphatheke kunhlelo ezifana lokulima ukudla.

Kodwa uDr Daniel Ndlela oyingcwethi laye kwezomnotho esebenza engaphansi kwenhlanganiso ye Strategic Economic Research and Analysts -SERA, esekelwa yinhlanganiso ye USAID, uthi ngaphandle kokuba ilizwe libe lemithetho ecacileyo, ehambelana lenhlelo ezibunjwayo akukho okungafezwa yimihlangano engenwa kokuphela yokudinga indlela zokuthuthukisa umnotho welizwe.

Owake waba ngumphathintambo wezokuqhutshwa kuhle kwemisebenzi kumankapani kahulumende ngesikhathi kubusa uhulumende womanyano, umnumzana Gorden Moyo uthi uvemelana lombono ophume emhlanganweni lo ukuba kudingwe indlela zokuvuselela amankampani.

Ubeka uhulumende weZanu Pf umlandu wokungaqakathekisi imicabango yabakunhlangothi ezitshiyeneyo kanye lelungelo loluntu, yikho engazihluphi ngokulandela inhlelo azisungulayo okubalisa olwe Kadoma Declaration lezinye ezingasalandelwanga.

Inkinga uMoyo uthi ayisizo lezo nhlelo okukhulunywa ngazo zokuthuthukisa umnotho welizwe, kodwa kuyikusilela kokuzinikela phezu kokwenza lokho okuhleliweyo.

Uhulumende ukhuthazwa ukuba akhangele udaba lokuthuthukiswa komnotho eqathanisa lokwenziwa kwamanye amazwe njengoba eleZimbabwe liphila lomhlaba wonke jikelele hatshi lodwa. Kuvunyelenwe njalo ukuba uhulumende aqale ngokuthuthukisa osomabhizimusi abayizizalwane zakuleli okungaphathisa ukuhuga abakwamanye amazwe.

Kunjalo nje uMnu. Dumiso Dabengwa, obekulo umhlangano ngoLwesibili, utshele uSithandekile Mhlanga weStudio 7 ukuthi usebenzise ithuba aliphiwe ngoMvulo ntambama ukuthi achasisele lumhlangano ngendlela uhulumende okumele aphathe ngayo ingatsha zakhe-ama ministries, kanye lamankampani akhe ama parastatals, ukwenzela ukuthi aphumelele.
please wait

No media source currently available

0:00 0:02:32 0:00
Lapho esitholakala khona
XS
SM
MD
LG