Obengummeli weHurungwe West edale lephalamende, engakaxotshwa kuZanu PF, umnumzana Themba Mliswa, uthi uvumelana lokuhlezi kukhulunywa ngabamabandla aphikisayo, ngomkhankaso wokuthi kumele kube lenguquko uqobo emithethweni yokuqhutshwa kokhetho eZimbabwe.
Emhlanganweni lentathelizindaba, owenzelwe eMedia Centre eHarare lamuhla ekuseni, uMliswa uthi ngaphandle kokuba ibe khona linguquko, kalusoze lwaqhutshwa ngendlela ukhetho eZimbabwe.
UMliswa, osezancintisa kulolukhetho ezimele, uveze ukuba akayi kuphatheka emikhankasweni yokudinga ukuvhotelwa ngoba efuna ukuvikela ukuchitheka kwegazi, esesabela abalandeli bakhe kudaba lodlakela njengalokho asanda kubhekana lakho kumpelaviki edluleyo.
Linkulumo kaMliswa imangalise intathelizindaba kanye lengcwethi kwezombusazwe ebezikulomhlangano okubalisa umnumzana Lennox Mhlanga.
UMhlanga uthi lalokho osekutshiwo nguMliswa ngoLwesithathu, phezu kodlakela olusebandleni axotshwe kilo, kuyinkulumo yomuntu osengaphandle kwalo, esebuzwa ubuhlungu abamabandla aphikisayo abahlezi ehlangana labo ngoba sokusenziwa lakuye.
Omunye wabakhankasela umbuso kazulu, umnumzana Pride Mukono uthi linkulumo kaMliswa, yokuthi iZanu Pf libandla eliphila ngodlakela, ngeyomuntu osebuhlungu, esekubona lokukuzwisisa abamanye amabandla abahlezi bekhala ngakho.
Wengeze uMukono ethi lalokho osekukhulunywa nguMliswa lamuhla, phezu kwenguquko yemithetho yokhetho kanye lodlakela lweZanu PF, ubengeke akukhuluma ngabe lokhe ephakathi kwalo.
UMliswa ubeka umlandu uDr Ignatious Chombo obona ngokuqhutshwa kwenhlelo kuZanu PF esithi nguye isitha esikhulu sikazulu weHurungwe West. Ethi nguye otshotshozela udlakela esigabeni lesi njengoba ehamba etshela abantu ukuthi bengalokothi bavotele umuntu oza engekho phansi kweZanu PF.