amalinks wokungena

Breaking News

UMnangagwa Uncoma Umsebenzi Wabebutho Ngelanga leDefence Forces Day


Umbuthano wokunanza ilanga labezomvikela eleDefence Forces Day, eHarare

Umongameli Emmerson Mnangagwa uncoma imisebenzi yabakubutho ngokulondoloza ukuthola ngesikhathi ilizwe libhekane lobunzima kwezomnotho.

Ngasikhathi sinye ucele uzulu ukuba ehlukane lokuphatheka kudlakela kanye lokuphazamisa ukuthula elizweni.

Inkulumo kaMnangagwa iza ngesikhathi abe MDC ekhokhelwa ngumnumzana Nelson Chamisa beqoqa ukutshengisela okumele kwezinye ngolweSihlanu mhla ka 16 Ncwabakazi.

UMongameli Emmerson Mnangagwa wamukelwe ngenhlonipho lapho engena enkundleni ye National Sports Stadium emkhosini wokunanza usuku lwabakubutho olwe Defence Forces Day lonyaka olunanzwa phansi kwendikimba ethi “ The ZDF: Guaranteeing Peace and Security for Development.”

Esethula umbiko wakhe uMnangagwa uthe uhulumende wakhe uzimisele ukulondoloza inhlalakahle yabakubutho ngoba bengabantu abazinikeleyo ukuqhuba umsebenzi wabo lanxa isimo kwezomnotho singesihle lakibo.

“Uhulumende wami uyazi ukuthi abakubutho labo bephatheka kubi yindubo eziphathelene lomnotho njengaye wonke umuntu elizweni. Imizamo yokukulungisisa lokho isikusibanga esiphezulu kakhulu, ukubuyisela njalo indlela eyayisetshenziswa ukuholisa abakubutho. Sizotshutshisa njalo lendaba yokwakhiwa kwezindlu zokuthi abakubutho bahlale kizo.”

Okhokhela iqula labammeli bakwamanye amazwe eZimbabwe ongummeli wele Democratic Republic of Congo, uAmbassador Mwawampanga Mwanananga ugcizelele ngokuqakatheka kokulondoloza ukuthula elizweni.

“Lingacabanga ukuthi into zinzima, lina elimele likwenze yikuqhubeka limanyene njalo libe lombono munye sikhathi sonke ”.

Njengenhlalayenza ibingekho inkokheli ye MDC lamanye amabandla aphikisayo kulumkhosi okuchazwe ngumsekeli kampathintambo wabakubutho umnumzana Victor Matemadanda ukuba yikwehluleka ukunanza imisebenzi yalaba bantu abanye babo bengabalwa impi yenkululeko.

“Bona bale freedom yokufoma ama Party lokunye konke ngendaba yokuthi ilizwe lakhululwa. Kukibo labo ukuthi babone labo babe le contribution kulanga elinje ngelanga lalamuhla. Kodwa nxa bengafuni, kuyabe kungumbono wabo.”

UMnangagwa utshele abekade besemkhosini walamuhla ukuba owalonyaka wahlukile ngoba ulezehlakalo ezimbili ebeziqakathekile ezibalisa ukunikezwa kwamihlobo yamaflag alembala etshiyeneyo kungatsha ezintathu zabohlangothi lwabakubutho abalwa ngendizamtshina olwe Air Force kanye lokunikezwa kwezicoco kwamalunga abakubutho alitshumi abaphathisa emsebenzini wokuhlenga lokusiza abehlelwa yingozi yezulu lesikhukhula esalethwa nguCyclone Idai ekuqaliseni komnyaka.

Kuvezwe njalo imihlobo eyehlukeneyo yendizamtshina ezisetshenziswa ngabeviyo lebutho lasemoyeni eleAirforce.

Lumkhosi ugqitshwe ngomdlalo wenguqu phakathi kwamalunga akubutho leZimbabwe lawakubutho lase Lesotho abethekelele eZimbabwe.

Uzulu ubelibaziswa ngendlela ezehlukeneyo okubalisa abakubutho abekade besehla kundizamtshina ngama parachutes bengena enkundleni, abekade befola ngendlela encomekayo, abezomculo okubalisa u Alec Macheso leqembu lakhe le Orchestra Mberikwazvo labanye.

please wait

No media source currently available

0:00 0:04:12 0:00

Facebook Forum

XS
SM
MD
LG