amalinks wokungena

Breaking News

Uyaqhubeka Umncintiswano wePremier Soccer League


Umbango wesicoco salonyaka esigabeni se Castle Premier Soccer League uqhubekela phambili ngemva kokuba amaqembu enguqu ahlezi phezu kwengalane athi iDynamos, iHarare City kanye le Highlanders ebe ngutshiki lobhanqa emidlalweni ebikhona ngempelaviki edluleyo.

Sekusele imidlalo emithathu ukuba imidlalo kanobhutshuzwayo eseigabeni se Castle Premier Soccer League ifike komlindi uyacina kodwa akula owaziyo ukuba kuyozalwa nkomoni ekufikeni emaphethelweni kwesizini yalonyaka.

Iqembu le Dynamos line ngutshiki lobhanqa 2 ka 2 lele Triangle kuthi i Harare City ibe ngutshiki lobhanqa 0 ka 0 le Black Rhinos ikanti iqembu le Highlanders libe ngutshiki lobhanqa 1 ka 1 lele Motor Action.

IDynamos le Harare City zilingene ngemiklomelo zombili zilemiklomelo engamatshumi amane lathoba munwe munye (49) kuthi ngemva kwazo kule Highlanders elemiklomelo engamatshumi amane lathoba minwe mbili (48).

Uzulu olandela umdlalo wenguqu ukhangelele ukuba intshantshu ziphume phakathi kweqembu le Dynamos kanye lele Highlanders kodwa isimo sengalane sikhomba ukuba yiloba yiliphi iqembu phakathi kwalawa amabili kanye le Harare City, iCaps United kanye le FC Platinum lilakho ukuphakamisa isicoco ekupheleni kwesizini.
I FC Platinum kanye le Caps United zihlezi ngemva kwe Bosso zilemiklomelo engamatshumi amane lanhlanu (45).

Ngaphansi kwengalane ikhuba liyala lilokhu litshona kuqembu le Monomotapa lona elihlezi kundawo yesithathu nxa usuka emsileni ikanti phezu kwalo kule Black Rhinos layo engahle iphindele kusigaba sika Division One uma ingekela ukubopha ziqine emidlalweni emithathu eseleyo.

****************************************

Sikhangele umdlalo wokugijima:
Umncintiswano wakuqala owe Masiyephambili Marathon uphose wabaliphutha ngemva kokuba kube lehlekana labadlali abakade bekhokhelwa zintshantshu ezithi u Cuthbert Nyasango, uWirimai Zhuwao kanye lo Samukeliso Moyo abatshotshozele abanye babo ukuba bengaphatheki kulumjaho ngeNsonto ekuseni.

Laba badlali bebesola ukuba kungani abaqoqi balumjaho behlele ukupha imivuzo abadlali abaphutshe bekundawo zakuqala ezintathu kuphela okwenze kwedlula amahola phose amane kulokhu kungacaci ukuba yini ethatha indawo.

Umncintiswano uze waqala phakathi laphakathi kwehola lesithoba munwe munye ekuseni njalo onqobe kumjaho wamakhilomitha angamatshumi amabili lanye (21 Kilometres) kucele labesilisa ngu Simbarashe Chigagada owe Black Rhinos kuthi kucele labesifazane kunqobe uOlivia Chitate owe Zimbabwe Republic Police.
Kumcintiswano wama khilomitha angamatshumi amane lambili kunqobe u Andrew Chimbidzikai oweqembu lebutho lesizwe kucele labesilisa kwathi kucele labesifazane kunqobe u Lizzie Chokore.

Obekhangelelwe ukuba anqobe kulumncintiswano kucele labesilisa uNkosiyazi Sibanda owe Blanket Mine uphutshe ekundawo yesithathu njalo ukhale ngokuba ukuphuza ukuqala njengembangela yokunganqobi kwakhe.

Lumncintiswano uqoqwe kuyindlela yokuthakazelela ukufikisa kwedolobho lako Bulawayo iminyaka engamatshumi ayisikhombisa (70 years) laphiwa inhlonipho yokuba lidolobho elipheleleyo.

Abadlali basukele enkundleni ye Luveve bagijima bedlula ezibhedlela ezinkulu ezedolobho lako Bulawayo ezigoqela iMpilo, iUBH, iMater Dei kanye leNgutsheni basebengena kumgwaqo uMasiyephambili sebelubhekise khona njalo enkundleni yeLuveve.
XS
SM
MD
LG