Umhlangano wokukhuthaza ukusungulwa kwamabhizimusi eZimbabwe uqhalise ngoLwesithathu eHarare lapho umphathintambo wezemali uMnu Tendai Biti othe umumo wenotho elizweni uyathuthuka ngendlela ejabulisayo.
UBiti uthe ele Zimbabwe lifuna izigidi ezilitshumi lane zamadollar eMelika ukwenzela ukuthi liququle umnotho walo owabhidlika ibandla likaMongameli Robert Mugabe lisabusa lodwa.
Uphinde wathi ucunulwa yindlela yokwabelana kwamashares amankampani emazweni ngaphansi komthetho we indigenization.
Umnu. John Nkomo umsekeli kaMongameli Mugabe uthi osomabhizimusi bemazweni kumele bethakazelele uhlelo lolu loba nje belakho ukulahlekelwa yingxenye yamabhizimusi abo.
UMnu. Adda Tadesse umsekeli womqondisi we Development Bank of Southern Africa utshele umhlangano lo ukuthi ibhanga lakhe selincedisana le Zimbabwe ukulungisa umgwaqo ovela ePlumtree usiya eMutare kanye lalowo osuka eChirundu usiye eBeitbridge.
Osomabhizimusi bathi umhlangano lo uyabanceda okwamagama kanye lelizwe ekuguquleni imicabango yalabo abasemazweni ngokwenzakala kwezenotho langezombusazwe eZimbabwe.
UMnu. Joseph Kanyekanye we Confederation of Zimbabwe Industries uthi umhlangano walonyaka ukhangelelwe ukuphumelela njengo wanyakenye.
Uthi nxa osomabhizimusi bemazweni bezibonela ukuthi kwenzakalani elizweni, balakho ukuhuga abanye babo ukuthi bavule amankampani kwele Zimbabwe.
Ingcwethi kwezenotho uMnu. Masimba Kuchera uthi kuyabukeka okwenziwa yi Euromoney Conferences eqoqe umhlangano lo logatsha lwezokuthuthukisa inotho yelizwe.
