Owayengusodolobho we New York eMelika uMnu. Michael Bloomberg oyisinothi, ibillionaire, uphumele egcekeni ngokusemthethweni ngeSonto ukuthi uzancintisa kukhetho lokudinga umongameli ngomnyaka ozayo.
UMnu. Bloomberg uthe injongo yakhe emqoka yokuncintisa kulolukhetho ngeyokuthi anqobe umongameli Donald Trump, abesevuselela ilizwe leMelika. Uthi okuzabangela ukuthi anqobe yikuthi ulolwazi olujulileyo kwezamabhizimusi, lakuhulumende.
UMnu. Bloomberg owayekubandla lama Republicans, uncintisa ezimele. Ngomnyaka ka2016 waxhasa uNkosikazi Hillary Clinton webandla lamaDemocrats owayencintisana loMnu. Trump kukhetho lokudinga umongameli.
Ngeviki edluleyo, uMnu. Bloomberg uxolisile ngomthetho wokuhlola mahlayana abantu kudingwa izikhali eNew York, ngesikhathi engusodolobho, okwakukhathaza kakhulu abantu abamnyama lamaHispanics. Kodwa abalwela ilungelo loluntu bamsolile besithi kusobala ukuthi uthatha lelinyathelo ngoba esedinga usekelo lokunqoba kukhetho.
UMnu. Bloomberg wayengumayor weNew York kusukela ngomnyaka ka 2002 kusiya koka2013. Ngalokho, uthi umazi kamhlophe umongameli Trump, laye engoweNew York, ukuthi usenga ezimithiyo nxa ekhuluma ngokuphumelela kwamabhizimusi akhe.
UMnu. Bloomberg ngumholi wenkampani yamabhizimusi enkulu kakhulu, egoqela ekamabonakude, imsakazo, kanye lamabhuku axwayisa abantu ngokusetshenziswa kwemali kuhle.
Umkhankaso wakhe ubikwa ukhokhe imali efika amadola ayizigidi ezingamatshumi amathathu-30 million dollars eyokwethula imbiko yokumkhansakela esakazwa kubomabonakude elizweni lonke kusukela ngeSonto.
