Umkhokheli webandla leMDC uMnu. Nelson Chamisa uthi wenqatshelwe ngamapholisa ukwethula umbiko wakhe oqondane lesimo sezombusazwe lesezomnotho elizweni, oweHope of the Nation Address eAfrica Unity Square eHarare ngoLwesithathu.
Kodwa isikhulumeli seMDC uMnu. Daniel Molokele wethule umbiko ngoLwesibili ntambama esithi umhlangano lo uzaqhubekela phambili emahofisini e-MDC eMorgan Tsvangirai House eHarare ngehola letshumi ekuseni.
Amapholisa alobele i-MDC incwadi esithi isizathu yikuthi kungaqhamuka udlakela ngoba kulabantu abanengi kakhulu edolobheni leHarare njengoba sokuyisikhathi sokulungiselela ikhisimusi njalo izisebenzi ezinengi zithole imali ye bonus.
Isikhulumeli samapholisa uMnu. Paul Nyathi utshele iStudio 7 ukuthi i-MDC ivinjelwe ukuqhuba lumhlangano eAfrica Unity Square kuphela hatshi kwezinye izigaba zelizwe.
Uthe amapholisa awavimbi imihlangano yonke yeMDC ngoba nanko phela oweMabvuku uziqhubekele kuhle ngeSonto edluleyo bengawuchitha-chithanga.
Kodwa isikhulumeli sikaMnu. Chamisa, uMnu. Nkululeko Sibanda uyawasola amazwi kaMnu. Nyathi.
