amalinks wokungena

Breaking News

UMnu. Gorden Moyo Utshiya Isikhundla Sokuba Ngumgcinisihlalo weMDC-T koBulawayo


Gorden Moyo
Umgcinisihlalo wecele leMDC elikhokhelwa ngumnumzana Morgan Tsvangirai koBulawayo umnumzana Gordon Moyo useze watshiya isikhundla sakhe ngemva kwenyanga ezintathu abantu bebuzana ukuthi uzathatha nyathelo bani.

UMoyo uthi ubudlwangudlwangu, ukudonselana, ukufuthelana, ukuxotshwa kwamalunga ebandleni lokungalandeli izinqumo zebandla ngezinye zezizatho ezibangele ukuthi atshiye lesi sikhundla. Kodwa uMoyo uthi uzaqhubeka elilunga lebandla leli elingela sikhundla.

Wakhethwa uMoyo ukuba ngumphathintambo kahulumende womanyano ngumnumzana Morgan Tsvangirai eseseyinhloko kahulumende engazake abe lesikhundla kulelibandla. Wasebenza gadalala kulelibandla waze wathola isikhundla sokuba ngumgcinisihlalo wakoBulawayo.

UChris Gande weStudio Seven uxoxe loMoyo omtshele ukuba laloba esethsiyile lesi sikhundla akayi kuxuku elikhokhelwa ngumnumzana Tendai Biti ngoba ebona kungelamehluko ongabakhona nxa amacele la engamanyananga.

Umsekeli kanobhala obona ngokuqoqwa kwenhlelo zebandla leli, umnumzana Abednico Bhebhe uthi bona njengebandla bayamukela inyathelo elithethwe nguMoyo njalo bayalihlonipha ngakhoke bazaqhubeka besebenza laye njengoba engatshongo ukuthi usetshiya ukuba lilunga njalo uzaqhubeka elilunga ledale lephalamende emele ibandla leMDC-T.
XS
SM
MD
LG