Umphathintambo kahulumende osebenza ewofisini kamongameli Emmerson Mnangagwa, uMnu. Joram Gumbo obotshwe ngoMvulo yiZimbabwe Anti-Corruption Commission (ZACC) imethesa icala lenkohlakalo ukhangelelwe ukumiswa phambi komthethwandaba inani lamacala akhe selengezelelwe.
UMnu. Gumbo ubikwa esiwe emthethwandaba okwesikhatshana, lanxa engamiswanga phambi kwawo, wasebuyela njalo ezandleni zeZACC yona eqhubeke imbuzisisa ngamacala awetheswayo.
Igqwetha likaMnu. Gumbo, uMnu. Selby Hwacha, ubikwa esithi ketheswanga icala ngokusemthethweni, njalo amapholisa asadingisisa ngokwenzakala kungatsha ayezikhokhela enguTransport Minister, kodwa uthi okunengi kwenzakala engakabi ngumphathintambo walolugatsha.
Umgcinisihlalo weZACC uNkosikazi Loice Matanda Moyo utshele iStudio 7 ngoMvulo ukuthi amacala etheswa uMnu. Gumbo agoqela ukutshaphazwa kwemali kunhlelo zenkampani yendizamtshina i Zimbabwe Airways, lokubuyisela emsebenzini isiphathamandla senkampani yeCMED esasisetheswa icala.
Ukuze sihlaziye loludaba, sixoxa loMfundisi Anglistone Sibanda, olwela ilungelo loluntu yena ogcizelela ukuthi kufanele iZACC isuthiseke ngamacala ewadingisisayo ingakayi emapholiseni.
