Umnu. Leo Mugabe, umzukulu kaMongameli Robert Mugabe, usebambisana labalwa impi yenkululeko, abesifazane abalamabhizimusi kanye labaninibhizimusi bemgodi emincane ukuthi bathenge amashares kunkampani ye Telecel Zimbabwe.
Umnu. Mugabe uthi inhlanganiso ebunjelwe ukuthenga amashares kunkampani ye Telecel iWealth Creation and Empowerment Council yiyo okumele ibe ngeyokuqala ukuthi ithenge amashares eTelecel kulokuthi athengwe yinkampani ye MTN efisa ukuthenga amashares awe Orascom Telecommunications.
Inkampani ye MTN le Orascom ziqhoba ithambo lokuthi iMTN ithenge amashares awe Orascom akunkampani ye Telecel Zimbabwe.
Kodwa-ke uMugabe ufunga agomele esithi akwenzakali ukuthi iMTN ithenge amashares la.Inkulumo lezi zilakho ukubhidlika okuzenza ukuthi inkampani ye MTN yehluleke ukufaka izigidi lezigidi zamadola eMelika kunkampani ye Orascom ebizathuthukisa inotho ye Telecel.
Kusenjalo, inkampani ye Nestle Zimbabwe ibikwa isiqhatshe uMnu. Kumbirai Katsande ongumqondisi we Confederation of Zimbabwe Industries ukuthi abe ngumqondisi wenkampani le eZimbabwe.
U Katsande ubikwa esevumile ukuthatha lesi sikhundla. Umnu. Promise Mkwananzi ingcwethi ecubungula ezombusazwe utshele uGibbs Dube we Studio 7 ukuthi ukuqhatshwa kuka Katsande kutshengisa ukuthi ubongelwa ukupholisa ukufuthelana phakathi kwe Nestle le Gushungo Dairy Estates eka Grace Mugabe, umka Mongameli Robert Mugabe.
Umnu. Leo Mugabe Ubambisana Lamaqembu Atshiyeneyo Ukwenzela Ukuthenga Amashares eTelecel
- Gibbs Dube
