Umqondisi wenhlanganiso ebona ngokusebenza okuqotho kwentathelizindaba eyeVoluntary Media Council, uMnu. Loughty Dube, usekhethwe ukuba ngunobhala jikelele wenhlanganiso ebona ngamalungelo entathelizindaba emhlabeni jikelele eye World Association of Press Councils.
UDube ukhethwe emhlanganweni oqhubekela phambili kwele Northern Cyprus.
Utshele iStudio 7 ukuthi ulethemba lokuba isikhundla sakhe esitsha sizakwenza intathelizindaba zeZimbabwe zisebenzelane kungela bandlululo lwabasebenzela uhulumende labasebenzela inhlanganiso ezizimeleyo.
"Ngiyathokoza kakhulu ngoba yinto esifaka lathi ukuthi umhlaba ubone ukuthi lathi siyasebenza," kutsho uDube.
Unobhala jikelele wenhlanganiso ye Zimbabwe Union of Journalists, uMnu. Foster Dongozi, laye owakhethwa ukuba ngunobhala jikelele wenhlanganiso emela intathelizindaba zezwekazi le Africa, utshele iStudio 7ukuthi bayamtshayela ihlombe uDube, ose Cyprus, ngokukhethwa kwakhe ngoba kuzakwenza kube lula ukusebenza kwentathelizindaba.
"... Simtshayela ihlombe uDube thina intathelizindaba zeZimbabwe lomhlaba wonke jikelele ... Simtshayela ihlombe," kutsho uDongozi.