amalinks wokungena

Breaking News

UMnu. Obert Mpofu Uzama Ukukhanga Abaphephela eBotswana Ukuthi Babuyele eZimbabwe


UMnu. Obert Mpofu

Umphathintambo obona ngendaba zasekhaya, uMnu. Obert Mpofu, uhlangane labbantu beZimbabwe abedlula amakhulu ayisithupha abaphephele kwele Botswana, phezu kodaba lokuthi baphindele ekhaya.

Kodwa iziphepheli lezi zithi zifuna ukuthenjiswa ukuthi azisoke zakhahlanyezwa uma zingabuyela ekhaya.

UMpofu uxoxisane leziphepheli zeZimbabwe enkambeni yeDukwi ngaphandle kwedolobho leFrancistown ngoLwesibili, emhlanganweni othethe amahola amabili.

“Ngemva kwesinqumo seBotswana kanye lenhlanganiso ebona ngeziphepheli eye United Nations Human Rights Commission on Refugees (UNHCR), sokuthi iziphepheli sekumele ziphindele ekhaya, zona zacela umhlangano lohulumende weZimbabwe kuqala.”

Umhlangano kaMpofu leziphepheli ube ungowokuzwa izikhalazo abangabe belazo, kumbe izizatho zokuthi kungani bengafisi ukuphindela ekhaya.

UMpofu uthi utshele iziphepheli ukuthi ziphenduke ekhaya ngoba izilwane zingasekho, lokhe kwangena uhulumende omutsha.

"Ngibatshele ukuthi umumo ekhaya usungcono, kungangcono bephenduke sizoncedisana ukwakha ilizwe sindawonye. Kodwa bathe bafuna ukuthi sibathembise ukuthi abasoke bathole ubunzima obabenza babuya eBotswana. Abanye bacele ukuthi bancediswe ngokuhlaliswa, ngoba imizi yabo seyadilika. Kade bebuza ukuthi uhulumende angabancedisa."

UMpofu uthi uhulumende wakhe uzimisele ukuthi ancedise iziphepheli ziphendele ekhaya kungelakwesaba.

Uthi isikhathi sokukhuluma ngombangazwe sesidlule, sekusakhiwa iZimbabwe entsha lokhe kwaqethulwa umbuso kamongameli Robert Mugabe ngoLwezi nyakenye.

“Akuncedi (ukukhuluma ngezombangazwe), ngibatshele ukuthi asilandanga ezombangazwe, ngibatshele ukuthi silande ukukhuluma ngokwakha iZimbabwe entsha, njalo labo abafisa ukuvota, kuzabalokuvota okulokuthula njalo lokuhloniphana."

Inengi leziphepheli labaleka eZimbabwe ngesikhathi sokhetho luka 2008 lokudinga omongameli olwalulodlakela kwabona, ikakhulu abasekela ibandla eliphikisayo leMDC, behlukunyezwa.

UMpofu njalo ukhulume labaphathintambo eBotswana phezu kokuhlukuluzwa kwabeZimbabwe abahlala eBotswana okungekho emthethweni kanye lokubulawa kwenkomo ezingena eBotswana.

“Ngibe lomhlangano phezu kwabantu bakithi abahleli lapha besebenza bengalamaphepha, njalo sikhulume langenkomo ezithi zingangena eBotswana zibulawe, akumelanga kube njalo ngoba ezinye inkomo ziyabe zintshontshiwe, njalo zifunakala njengo bufakazi emthethwandaba."

EleBotswana libulala inkomo ezingena zivela eZimbabwe, lisithi yizo ezidala ukumemetheka komkhuhlane womlomo lamasondo.
IBotswana ithengisa inyama yayo emkambo we European Union yona engafuni ukuthi inyama ivele lapho okulomkhuhlane womlomo lama sondo.
IZimbabwe yasola inyathela lokudubula inkomo, isithi akudingwe ezinye indlela okungasentshenziswana ngazo.

Udaba Esilethulelwe NguMartin Ngwenya
please wait

No media source currently available

0:00 0:03:15 0:00

Facebook Forum

XS
SM
MD
LG