Obengumsekeli kamkhokheli wePeople’s Democratic Party (PDP) uMnu. Samuel Sipepa Nkomo sesukile kulelibandla waya kubandla elikhokhelwa nguNkosikazi Joice Mujuru eleZimbabwe People First.
USipepa Nkomo ubengumsekeli kaMnu. Tendai Biti kubandla lePDP.
Ekhuluma emhlanganweni awenze lentathelizindaba koBulawayo ngoLwesine uNkomo uthe uhambe kubandla likaMujuru ngoba likhanya liyilo elilamathuba aphezulu okunqoba iZanu PF kukhetho.
Isiphathamandla seZimbabwe People First uMnu Methuseli Moyo utshele iStudio 7 ukuthi uSipape ubuye labantu abedlula amakhulu amathathu ekade bengamalunga ePDP.
“Ubaba uNkomo ukhulume njengomuntu omdala, uthe lapho avela khona utshiye kwakhiwe,” kutsho uMoyo.
“Kodwa uthe ubonile ukuthi lapho aya khona kumbe aza khona kathesi uzoncedisa ukuthi kukhitshwe uhulumende weZanu lo okhona.”
