Umkhokheli webandla le People’s Democraric Party, uMnu. Tendai Biti usekhweze udaba lokwalelwa amabandla ukuthi etshengisele emthethwandaba.
UBiti wethule amaphepha la ngoMvulo emthethwandaba wathi uzathetha loludaba ngoLwesithathu.
Amapholisa amisa ukutshengisela okwamaviki amabili esithi kawenelisi ukulondoloza ukuthula ngenxa yodlakela oluqhamuka nxa kutshengiselwa.
Kodwa uBiti lamanye amagqwetha bathi ukutshengisela kulilungelo likazulu phansi kwesisekelo sombuso ngalokho okwenziwa ngamapholisa yikwephula umthetho.
"Osekwenzakala kutshengisa ukuthi amapholisa awasela macebo njalo uMongameli (Robert) Mugabe laye usephelelwe ngumphako," kutsho uBiti.
Ukuhlaziya loludaba sixoxe lengcwethi kwezombusazwe, uMnu. Rejoice Ngwenya, saqala ngokumbuza ukuthi ukwethusela omantshi labehluli bomthethwandaba okwenziwe nguMongameli Mugabe kungabe kutshengisani.
UNgwenya uthe, "Sizananzelela ukuba isisekelo sombuso siyachasisa kuhle kusahloko esithiwa ama bill of rights uzulu uyavunyelwa ukutshengisela ngoba kuyindlela yokutshengisela ukuba okwenziwa nguhulumende akakufuni uzulu."
