amalinks wokungena

Breaking News

Izakhamizi zakoBulawayo Zithi Zizimisele Ukusebenza Nzima Lonyaka


Izakhamizi zakoBulawayo zithi zizimisele ukusebenza gadalala ngalumnyaka oqale ngoLwesithathu oka2014 okhanya uzakuba nzima kulandela ukusilela kwemali, ukuvala kwamabhanga athile kanye lokuswelakala kwemisebenzi.

Umnyaka lo wamukelwe ngentokozo enkulu endaweni ezitshiyeneyo zelizwe lapho inengi belibunatha lingabuthelanga amanzi, lilokhu libheke ngawayizolo ukuze lithi ekuhle 2014 eqala phakathi kwamabili.

Lanxa kubelentokozo, lonyaka abantu bebengajabuli njengakweminye iminyaka edluleyo ngenxa yokukhathazeka ngenotho yelizwe lokucabanga ngenhlawulo zezikolo okuzamele zibhadalwe kumaviki azayo izikolo zivulwa.

Kunengi okusemcabangweni kazulu, ilanga lakuqala lomnyaka elibekela ukuhlela izifiso kanye lokujonga lokhu umuntu adinga ukuthi abe esekufezile usiyaphela umnyaka.

UNkosikazi Nkosinomusa Sibanda, oyisakhamuzi, uthi uyawujabulela umnyaka omutsha ngoba elahlekelwe yizihlobo ezinengi ngomnyaka ophelileyo.

Uthi kodwa ulokunqineka ngokuthi iyozala nkomoni lonyaka njengoba kukhanya kungabi lenguquko kunotho yelizwe kodwa ngani uqhubeka ubhidlika ngamandla.

UNkosazana Getrude Nsingo, osekolitshini, uthi amathemba akhe lonyaka agxile ekuthini uhulumende athuthukise amathuba okufunda kanye lokuthi anike abantwana abafunda ema university imali yokuziphilisa.

Uthi ukhangelele ukuthi umnyaka lo inotho yelizwe ithuthuke, uhulumende enelise ukunika amakolitshi imali yokuthuthukisa indlela zokufunda hatshi ukuba kulokhu kudliwa ngoludala amanye amazwe eseguqule indlela afundisa ngayo.

UMnumzana Kizito Muchenwa, yena okwezombusazwe, uthi akula okuhle akukhangelele kulumnyaka kulandela impumela yokhetho lwanyakenye. Uthi lumnyaka uqala ngemibuzo eminenginengi kulowanyakenye owaqala abantu belethemba ledlabuzane bekhangelele ukuthi ukhetho luzakuza lenguquko lentuthuko elizweni. Uthi lanxa kunjalo, uzulu kumele azitshayele ihlombe ukuthi ungene lumnyaka elesisekelo esitsha sombuso esabunjwa ngembono yezizalwane zakuleli.

Akwaziwa ukuthi umnyaka lo uphetheni njengoba nje livele liphuma lendaba litshone lendaba kodwa sithi halala 2014.
XS
SM
MD
LG