amalinks wokungena

Breaking News

UMongameli Biden Ukhuthaza Uzulu weMelika Ukuthi Ebambane


U.S. President Joe Biden delivers his speech after he was sworn in as the 46th President of the United States on the West Front of the U.S. Capitol in Washington, Jan. 20, 2021.

UMongameli weMelika omutsha uMnu Joe Biden sekhuthaze izizalwane zelizwe lakhe ukuthi zibambane kungelani lokuthi aziboni ngaso linye kwezombusazwe.

UBiden wethule amazwi la ekufungisweni kwakhe lomsekeli wakhe uNkosikazi Kamala Harris eWashington DC izolo.

UBiden uthethe intambo zombuso kulokufuthelana okukhulu eMelika ngendaba zombusazwe ngoba abasekeli bakaMnu Donald Trump besithi waqilibezela lanxa nje kungelabufakazi.

Ngokunjalo, ucele uzulu ukuthi ebambane ukuze abhekale lenkinga ezifana lomkhuhlane weCovid-19 benyandanye.

UBiden usole abamhlophe abazonda eminye imihlobo kanye lalabo abenza udlakela abafana labasekeli bakaTrump bona abahlasele edale leCongress kumaviki amabili edluleyo.

Uthe uhulumende wakhe kasoze avumele ubundlwangudlwnagu obunje.

UBiden uthembise njalo ukuqakathekisa ubudlelwano beMelika labangane bayo, hatshi obekusenziwa nguhulumende kaTrump.

“Impande zesigodlo sethu zike zazanyazanyiswa ludlakela. Kodwa namuhla siza ndawonye sililizwe linye phansi kukaNkulunkulu njalo singehlukaniseki kulumkhosi wokuqhubelana amandla ngokuthula,” kutsho uMongameli Biden.

Umsekeli kaBiden uNkosikazi Kamala Harris yena wenze imbali ngokuba ngowesifazaka wakuqala ongumsekeli kaMongameli weMelika.

Ube ngonsundu wakuqala njalo ukuba kulesisikhundla.

“Sasisithi mhlawumbe uBiden uzakhetha umlungu kodwa sabona ngomnyaka ophelileyo ukuthi kwaba lokutshengise phezu kodaba lukaGeorge Floyd, okungokunye okwabangela ukuthi uMongameli Biden akhethe umunntu wesifazana onsundu,” kutsho ocubungula ezombusazwe uMnu Tim Muringayi.

Omunye njalo ocubungula ezombusazwe uMnu Difa Dube utshele iStudio 7 ukuthi mkhulu umsebenzi uBiden abhekane lawo.

“Ubaba uBiden useselebanga elikhulu kakhulu amele ukuthi alivale kumbe alisondeze kumhlaba wonke jikelele,” kutsho uMnu Dube.

Ekhuluma ngodaba lwabamhlophe abazonda eminye imihlobo uMnu Muringai uthi ngempela uzulu kumele ebambane ekulwiseni abantu abanje.

“Lapha kumele lathi abantu abamnyama sibancedise labo ukuthi kube lokubambana eMelika. Lokho kungafezeka nxa imihlobo yonke ingaphathwa ngokulinganayo,” kutsho uMnu Muringai.

UMnu Trump yena ubengekho ekugcotshweni kukaBiden ngoba uthi waqilwa kukhetho. Kodwa umsekeli wakhe uMnu Mike Pence ubekhona.

UTrump uzathonisiswa ngecala lokuphehla udlakela kudale leSenate maduze kulandela udlakela olwadalwa ngabasekeli bakhe.

Kulemibuzo eminengo ngelakusasa lakhe kwezombusazwe, abanye besithi mhlawumbe ulakho ukubumba elakhe ibandla aphume kwelamaRepublicans.

Ngaphandle kokufuthelana okuseMelika uBiden uthatha intambo ngesikhathi ilizwe leli libhekane lobunzima bomkhuhlane weCovid-19, wona osubulele abantu abedlula inkulungane ezingamakhulu amane, 400,000 kulelilizwe.

Abake baba ngoMongameli beMelika abagoqela uMnu Bill Clinton, uMnu George Bush loMnu Barrack Obama labo bebekhona kulumkhosi.

please wait

No media source currently available

0:00 0:06:09 0:00

Facebook Forum

XS
SM
MD
LG