UMongameli Emmerson Mnangagwa usephindele ekhaya ngemva kokuyangena umhlangano wenkokheli yamazwe awezwekazi leAfrica, wokuphawula okusemthethweni umbukiso wezokuthengiselana owe Intra-African Trade Fair, owenzelwa eThekwini kwele South Africa.
Emazwini akhe awethule emkhosini lo, uMnangagwa uthe imbukiso yaloluhlobo iqakathekile kakhululu ekuthuthukiseni umsebenzi wokuthengiselana phakathi kwamazwe awezwekazi leAfrica.
“Masiqhubekeleni phambili ukusebenzisa imibukiso yaloluhlobo okufana lowe Intra-African Trade Fair ukuthuthukisa amathuba wokuthengiselana impahla lalokho esikwenzayo emazweni ethu. ”
Isiphathamandla senhlanganiso eqondisa umsebenzi wokuthengiselana eye ZimTrade umnumzana Allan Majuru utshele abephephandaba leHerald ukuba bahambile embukisweni lo ngoba bewabona amathuba okuthuthukisa ukuthengiswa kwempahla yeZimbabwe kwamanye amazwe awezwekazi leAfrica.
Kodwa umnumzana Solomon Dube wakoBulawayo ungomunye wabathi lanxa iqakathekile imibukiso yaloluhlobo besingekho isizatho sokuba uMnangagwa kube nguye oyingenayo sikhathi sonke.
“Mina ngibona angani lapha kudlaliswa isikhathi le Foreign Currency leyo evele ikhona enlutshwana. Ngoba siyazi mhlophe ukuthi, ama trip akhe la uPresident, awalethi result ngitsho. Akula ma-investors abonakala ebuya, kunini ehamba?. Ama-investors esiwabonayo, ngama China kuphela. Kodwa siyazi mhlophe ukuthi i-foreign currency le esetshenziswayo, ayikho. Amatitshala afuna yona, ayakhalaza ukuthi afuna imali nge foreign currency njengalokho obekuyikho kudala kodwa baphiwa ama-excuses amanengi.”
Okungumbono ogcizelelwe yingcwethi ecubungula ezomnotho umnumzana Masimba Manyanya.
“Ilizwe lisenkingeni okwesibanga esiphezulu kakhulu, lingekho ithemba lokuthi kuzakuba ngcono. Isimo ezikolweni, inhlelo zezemfundo, sikhuluma ngezempilakahle lokunye okunenginengi. Munye kuphela okhuluma kuhle ngesimo esiselizweni, nguMthuli Ncube, umphathintambo wogatsha lwezemali. ”
Umhlangano owenziwe ekusungulweni kwalumbukiso ubikwa ubukhangelelwe ukugxila ekuhlaziyeni isivumelwano esisanda kwenziwa sokuthengiselana, ese Africa Continental Free Trade Agreement ( AFCFTA). Lesi sivumelwano sibikwa silakho ukuphathisa ekuthini abamankampani ase Zimbabwe banelise ukuyathengisa impahla yabo emikambo etshiyeneyo yasezwekazi leAfrica.
Kunje inhlanganiso yeZimtrade ikhokhele iqula labamankampani angamatshumi amathathu akuleli ayephatheka ukubukisa impahla etshiyeneyo elungiswa elizweni.
