Abasekeli bakamongameli welizwe, oMnu. Constantino Chiwenga loKembo Mohadi babikwa bengezwa kuhle emzimbeni okubangele ukuthi basiwe phandle kwelizwe ngesikhathi umongameli Emmerson Mnangagwa ekhanglelwe ukuya emhlanganweni kwele Ethiopia.
UChiwengwa, uke wathiwa ubeselatshwa kwele South Africa okwabangela ukutshengisela kwabantu ukuthi asuke kuleso sibhedlela, ubonakele emsakazweni we ZBC esithi ngamanga ukuthi uyagula njalo uqine saka. Kodwa umfanekiso ubutshengisa umuntu ogulayo osenciphe umzimba.
Iphephandaba lobulembu be Internet ele Zimlive lithi uMnu. Chiwenga uphaphe ngendizamtshina wagijinyiselwa kwele India ukuya kwelatshwa. UChiwenga ubikwa egula amanxeba empi yenkululeko lanxa kuke kwaphuma imbiko ethi wafakelwa itshefu phambilini kokususwa esikhundleni okwenziwa uMnu. Robert Mugabe.
Okumele kube nguye ozaphatha isikhundla sikamongameli nguMnu. Mohadi laye obikwa egijinyiselwe kwele South Africa ukuyakwelatshwa umkhuhlane ongaziwayo. UMohadi ubikwa elakho ukuphenduka elizweni ngoLwesihlanu umongameli Mnangagwa engakasuki elizweni.
Ukuhlaziya loludaba uChris Gande we Studio Seven uxoxe lengcwethi ecubungula ezombusazwe, uMnu. Ngqabutho Mabhena, njalo ongumkhokheli webandla le Zimbabwe Communist Party.
