Izizalwane zezimbabwe ezihlala emelika zithi zikhathazekile ngokwesulwa komhlangano eNew York ngeSonto ekuseni, lapho ebezikhangelele ukuxoxisana lomongameli Emmerson Mnangagwa, zimbuzisisa ngemizamo ayenzayo ukulungisa umnotho welizwe kanye lamalungiselelo okuthi zivote ngohlelo lwediaspora vote.
Umongameli Mnangagwa usemhlanganweni we United Nations General Assembly edolobheni le New York, njalo ukhangelelwe ukwethulela lumhlangano umbiko wakhe omqoka phakathi kwayonale iviki.
Usehlangane lamalunga ebandla lakhe leZANU PF, lapho umphathintambo obona ngezemali uMnu. Mthuli Ncube abonakale kumabonakude etshaya isilogana sebandla leZANU PF ndawonye lezinye iziphathamandla zikahulumende.
UMnu. Den Moyo, isiphathamandla sebandla leMDC-T obekhangelele ukuphatheka kulumhlangano uthi baziswe ekuseni ngeSonto ukuthi awusekho, njalo abaphiwanga isizatho esicacileyo. Uthi bekubunjwe iqembu lebulenjini elibizwa ngokuthi yi Diaspora Engagement lapho obaphosele khona imibuzo yabo.
Umgcinisihlalo webandla leZANU PF kuhlangothi lwe East Coast eMelika uMnu. Frenk Guni ugcizelele ukuthi ngempela umhlangano lo wesuliwe ngoba umongameli Mnangagwa ebambekile.
Utshele lumsakazo ukuthi umhlangano lo uzaqhubeka umongameli Mnangagwa engathola ithuba.
UMnu. Guni wengeze wathi umongameli Mnangagwa uzimisele ukuphendula imbuzo yonke ezabuzwa yizizalwane zezimbabwe njengalokho akwenza ngomnyaka odluleyo emhlanganweni ofanayo.
Kusenjalo, umphathintambo kahulumende obona ngenhlelo zemali uMnu. Mthuli Ncube uthi kufanele ukuntshintsha idola leZimbabwe lisiya kwelemelika kube yisilinganiso sokuyisithupha; one is to six, kugxile ku real exchange rate njenge Rand yeSouth Africa.
Wethule umbiko wakhe enkundleni yebulenjini eyetwitter esemhlanganweni ofanayo.
Kodwa uMnu. Rejoice Ngwenya, ingcwethi ecubungula ezombusazwe uthi kavumelani loMnu. Ncube.