Umhlangano wabalwa impi yenkululeko obukhangelelwe ngamehlo abomvu ukuthi ungalungisisa inkinga ezikubandla leZanu PF lelizweni, ezigoqela ukuqhubeka embusweni kukaMongameli Robert Mugabe lokunye uphele kungekho okunengi okukhomba ukuthi kube lesisombululo.
Abalwa impi laba bakubeke sobala ukuthi kabathakazeleli okwenziwa nguNkosikazi Grace Mugabe lenye inkokheli yeZanu PF.
Ngabalwa inkululeko labo becula ingoma ababezicula ngesikhathi besempi, emhlanganweni ongenwe ngamalunga ale nhlanganiso ye Zimbabwe Nationa Leberation War Veterans Association, owenzelwe eCity Sports Centre lamuhla.
Lumhlangano uza ngemva kokuba abalwa impi laba beke batshaywa ngamapholisa abathela ngamanzi ababayo kunye lentuthu ehitshayo ngesikhathi befuna ukungena umhlangano munye ngenyanga edluleyo.
Lokhu kwabangela ukumiswa ebandleni lesikhundleni sokuba ngumphathintambo obamelayo, umgcinisihlalo wabo umnumzna Christopher Mutsvangwa.
Umhonitshwa wabalwa impi laba, ongumongameli welizwe njalo, uMnu. Robert Mugabe utshelwe ukuthi ibandla selaphuma kuziqondiso zalo bethi kuyibona kuphela abangakulungisisa lokho njengoba beyibona nsika yebandla leZanu PF.
Ekuphenduleni kwakhe umongameli Mugabe, njengenhlalayenza usebenzise indlela ahlezi eyisebenzisa lapho engeniswe phakathi kwelitshe lembokodo, atshotshozele abalwa impi yenkululeko laba ukuba bathathe imigodhi kanye lokuba beyengena kumapulazi abelungu aseleyo.
Bakubeke sobala abalwa impi yenkululeko laba kuzivumelwano abazenzileyo, zethulwa ngumnumzana Munyaradzi Machacha, phezu kweziqondiso zomhlangano ( ideology ), lapho betshele uMugabe okubakhathazayo ngendlela umsebenzi uqhutshwa ngayo okunje ngokuthi abonela umhlangano bexotshwa mahlayana.
Kodwa uMugabe njengakwenza ngeminyaka edluleyo,ubathembise izulu lomhlaba, ebatshotshozela ukuba bathathe okuseleyo kumapulazi abelungu kanye asaseleyo.
Wengeza uMugabe ethi abalwa impi yenkululeko laba kumele bangene kwezokwenjiwa kwamatshe aligugu ngoba kulilungelo labo.
Umgcinisihlalo enhlanganisweni ye Zimbabwe National Liberation War Veterans Association, uMnu. Christopher Mutsvangwa, kazange aphiwe ithuba lokukhukhuluma kulomhlangano.
Lumhlangano uvumelane ukuba uzenziwa minyaka yonke bahlangane loMongameli Mugabe kanye ngomnyaka kuxoxisanwa phezu kokuphathelene labalwa impi yenkululeko laba.
Lumhlangano ungenwe ngabalwa inkululeko abedlula phose inkulungwane ezilitshumi. thousand ), okubalisa inkokheli evele kuzigaba zonke zelizwe, okubalisa abavela kubutho.
Kunjalo nje, okunye kokuphume emhlanganweni phakathi kukamongameli Robert Mugabe labalwa impi yenkululeko kwethuse abanengi.
Umongameli Mugabe ubikwa ekhuthaze abalwa impi yenkululeko laba ukuthi kabayethatha imigodi njengalokho abakwenza amaphulazi.
Okuyinto ebikwa ngomunye wabalwa impi yenkululeko ekuviyo lebutho ele Zipra uNkosikazi Grace Nuku ukuthi akatshongo ukuthi bayehluthunela abantu kodwa bayethatha leyo engasasebenzi eyabalekelwa ngabamhlophe.
Ukuhlaziya okuphume kulumhlangano uPraxedes Jeremiah uxoxe lonkosikazi Nuku lengcwethi ecubungula ezombusazwe umnumzana Patrick Mpofu. Umqali siziba kungunkosikazi Nuku obekhona emhlanganweni waseHarare.