Umongameli Robert Mugabe ufike kwele France ngoLweishlanu emhlanganweni wokuhlaziya ukuguquka komkhathi, owe United Nations Framework Convention on Climate Change.
Umsakazo we ZBC uthi uMugabe, ongumgcinisihlao womanyano we African Union, ubekhatshwe ngunkosikazi wakhe uGrace Mugabe labaphathintambo abathi owebudlelwano lamanye amazwe, uMnu. Simbarashe Mengegwi lowezemvelo lomkhathi, uNkosikazi Oppah Muchinguri – Kashiri.
Omela iZimbabwe kwele France, uNkosikazi Rudo Mabel Chitiga utshele iStudio Seven ukuthi mpela uMugabe lequla lakhe sebefikile kwele France.
Kubikwa umkhathi ubumubi okwenze ukuthi indizamtshina kaMongameli Mugabe yehluleke ukuyehla egcekeni lendizamtshina yaze yayakwehlela kwelinye idolobho lapho kade kungcono.
Lokhu sikudaba olufanayo, kumizamo yokunqoba umonakalo osubangelwe yikuguquka komkhathi – iClimate Change ngesilungu, uzulu wesigabeni seInsiza e Matebeleland South, usesungule uhlelo lwakuqala lokuhlanyela izihlahla ngaphansi kohlelo lwe PEACE GARDENS.
Lokhu kuvezwe ngomunye wamalunga enhlanganisweni le ephatha lumsebenzi eye Third Millenium Foundation Trust, uMnu. Reuben Nkulumo Ncube, ongumhlanyeli wezihlahla oveze ukuba lokhu kwenziwa besebenzelana labohlangothi lwe Forestry Commission.
Izihlahla ezilihlanyelwa kakhulu ngaphansi kwaloluhlelo kungezibalisa eseMoringa lese Leucaena. Indumba zesihlahla se Moringa zithiwa yi Leucaena. UNcube uthi ziyadliwa njalo kucatshangelwa ukuthi ziyelapha imikhuhlane etshiyeneyo.
UNcube uthi abakwenzayo kungenye yendlela ezingaphathisa ukuvimba ukungezwani ezigabeni sekubangwa amadlelo lokudla ngoba ukudla sekusilela ngenxa yomonakalo wokuguquka komkhathi.
Nxa lungaphumelela loluhlelo esigabeni se Insiza, e Avoca, uNcube uthi lulakho ukusabalaliswa kwezinye izigaba lapho izulu elingasani khona kakuhle njalo komile, ukudla lamadlelo sekusilela.
