amalinks wokungena

Breaking News

Umongameli Mugabe Usezayehlisa Iphika Kulandela Ukwehla Esihlalweni kukaMongamli Ian Khama


Umongameli Ian Khama weleBotswana

Umongameli Robert Mugabe usezayehlisa iphika ngemva kokuba obemthwalise amagabha avuzayo, umongameli Ian Khama wakweleBotswana, esevalelise inhlanganiso yeSADC eSouth Africa ngempelaviki ngoba uzakwehla esihlalweni ngoMabasa womnyaka ozayo.

Kusukela ngesikhathi engena kunhlanganiso yeSADC ngemva kokugcotshwa njengomkhokheli weBotswana ngo 2008, uKhama kazange achithe isikhathi ekuchothezeni umongameli Mugabe.

Lokhu kweza ngesikhathi iSADC ikhangelelwe njengenhlanganiso yabangane kanye lamabandla awaletha uzibuse emazweni atshiyeneyo, ukuchothozana kuzila.

Kodwa umongameli Khama, njengomuyi umongameli Levy Mwanawasa weZambia, babhukutsha bephambana labanye.

ISADC yathi ivale umlomo ingafuni ukukhuluma ngodaba lokhetho olwaba lodlakela oluka 2008, uKhama waphumela egcekeni esithi okwenzakala eZimbabwe kwakungalungaga.

IBotswana yaba lilizwe lakuqala emhlubulweni weSADC ukuchothoza ukhetho lweZimbabwe luka 2013, isithi kwakungamadlwane njalo kulobuqili.

Umongameli Khama wake watshengisela ukuzonda lapho ebikwa engazange ahambelane lomongameli Mugabe kumhlangano weSADC eVictoria Falls ngo2014. UKhama wabikwa ephume umhlangano owagcoba uMugabe njengomgcinisihlalo, ungakapheli.

Kodwa uMugabe wazama ukutshela uKhama ukuthi ungumfana omncane yena wayekhuluma njalo engumngane lobaba kaKhama uSir Seretse Khama, umongameli wakuqala wakweleBotswana.

Esinye isizalwane seZimbabwe kweleBotswana sithi kuyadanisa ukuthi umongameli Khama, usengene esikhundleni njalo usesiyaphuma kodwa etshiya inkokheli endala, esiphelamandla ilokhe isesikhundleni

Njalo uthi uKhama nguye akade esenelisa ukukhuluma uma engavumelani lokwenziwa nguMugabe…

"Kuyadanisa ngoba kuhamba umuntu obe esenelisa ukutshela uMugabe mathupha, elesibindi sokuthi sikhulume ngendaba ezenzakala eZimbabwe," kutsho isizalwane se Zimbabwe.

Omunye umnunzana Dumi Ncube uthi isibindi ebesitshengiswa nguKhama emhlubulweni weSADC sizatshiya igodi elizathatha isikhathi ukuthi livaleke.

"Ukuphuma kuka Khama sekuphumuza uMugabe ngoba uKhama nguye okade esenelisa ukukhuluma engafihli umphini,” kutsho uNcube.

UKhama uke wathinta ekanyolovu ngemva kokutshela uMugabe ukuthi isikhathi sokutshiya isikhundla, adelele abanye sesitshayile.

Ukwehla esihlalweni kuka Khama akwejayelekanga kunkokheli yamazwe ezwekazi le Africa.

please wait

No media source currently available

0:00 0:02:46 0:00

Facebook Forum

XS
SM
MD
LG