Umongameli Omar Al-Bashir weSudan usesuswe embusweni libutho lalelolizwe njalo selimemezele ukuthi kuzabunjwa ikhansili ezabusa okweminyaka emibili andubana kuqhutshwe ukhetho lokudinga umkhokheli omutsha walelolizwe.
Umphathintambo kahulumende weSudan obona ngezomvikela Awad Mohamed Ahmed Ibn Auf ubikwa ethule umbiko kumabonakude esithi uMnu. Al-Bashir, osebuse iSudan okweminyaka engamatshumi amathathu, ugcinwe kuhle ngamasotsha.
Sokumenyezelwe iState of Emergency kulelolizwe, kanye le curfew phakathi kwehola letshumi ntambama kusiya kwelesine ekuseni 10pm to 4am.
Abantu abakade betshengisela kusukela ngoMpalakazi nyakenye besithi uAl-Bashir katshiye umbuso ngoba umnotho welizwe uqhubeka usiwa, babikwa bajabule, njalo bagonane lamasotsha, bagada lemota zabo ebezibhoda-bhoda esigodlweni iKhartoum. Kodwa eminye imbiko ithi abantu abathokozanga ngokuthi ibutho yilo elikhetha ikhansili njalo bafuna ukuqhubeka betshengisela.
Umongameli Al-Bashir owayelilunga lebutho, wathatha intambo zombuso ngomnyaka ka 1989 ngemva kokukhokhela ukukhupha owayeyinhloko kahulumende uSdiq al-Mahdi embusweni, esebenzisa inhlanganiso yakhe yeRevolutionary Command Council for National Salvation, eyiyo eyabusa lelolizwe engakabi ngumongameli.
Umthethwandaba weInternational Criminal Court, ufuna ukumthonisisa amacala okwephula ilungelo loluntu kanye lokubulala eDarfur phakathi komnyaka ka 2003 lo 2008. Ukuhlaziya loludaba, sixoxe loMnu. Bekezela Maduma Fuzwayo, ingcwethi ecubungula ezombusazwe yena othi kungaba lenye njalo ingxabano njengoba abantu besithi abafuni uhulumende okhokhelwa ngamasotsha.
