UMongameli weleSouth Africa uMnu Cyril Ramaphosa useyekethise iziqondiso zokwenqabela ukumemetheka komkhuhlane weCovid-19 ngokususa ilizwe lakhe kuzinga lesine, u-Level 4 walisa kuLevel 3.
URamaphosa wazise izolo ebusuku ukuthi amakhefa asezavulwa abesevalwa ngo9 O’clock ntambama kanti utshwala labo sobuvunyelwa ukuthengiswa.
Uthe izikolo zizavulwa namuhla kanti lokuhambahamba abantu besuka esabelweni thize besiya kwesinye sokuvunyelwa.
Kodwa uthe abantu kumele bakwenze ngonanzelelo begqoke ama-mask ngaso sonke isikhathi ngoba umkhuhlane lo ulokhe umemetheka.
UMongameli Ramaphosa uthe uhlelo lokumisa ukuhambahamba kwabantu, i-curfew ilokhe ikhona kusukela ngo10 O’clock ntambama iyephela ngo4 O’clock ekuseni.
URamaphosa uthe njalo uhulumende uzaphathisa abantu abalahlekelwe yimisebenzi ngenxa yodlame olusanda kwenzeka kulelolizwe kanye lalabo abalahlekelwa yimisebenzi ngenxa yeCovid-19 ndawonye labampofu.
Abantu laba bazaphiwa amaR350 ngenyanga, wona ake aphiwa abanye nyakenye.
Uthe uhulumende wakhe uzaphathisa njalo amankampani wonke alahlekelwa yimpahla kuloludlakela ukuze avuke.
Isiphathamandla senhlanganiso yeZimbabwe Community in South Africa uMnu Bongani Mkhwanazi utshele iStudio 7 ukuthi lanxa amanyathelo lawa ejabulisa, aweneli ukuphilisa izimuli.
