UNkosazana Judith Ncube useBhilithane lequla lakhe, esethekelela lelo lizwe okwensuku ezilithumi ngemva kokunxuswa ngabenhlanganiso ephathisa amazwe awezwekazi leAfrica kwezomnotho lentuthuko, eyeBritish African Business Alliance-BABA.
UNkosazana Ncube ukhokhela iqula eligoqela iziphathamandla zogatsha lokwethekelelwa kwelizwe labebhanga elikhulu lelizwe eleReserve Bank of Zimbabwe kuhambo lokwethekelela amadolobho atshiyeneyo aweNgilande bekhatshwe ngababanxusileyo abenhlanganiso yeBABA behlangana labosomabhizimisi.
Ngemva kwemihlangano labeBhilithane iqula leli libe lethuba lokuhlangana lezizalwane zeZimbabwe esezihlala kweleBhilithane ezidabuka koBulawayo.
Unkosazana Judith Ncube uchasisa kabanzi ngalumhlangano.
"Sibuye lapha ukuzofaka amakhanda ethu ndawonye labantwabethu labafowethu. Uhambo lolu olukhangela ngezentuthuko koBulawayo sincedisane. Sidinga I input eyabantwabethu,eyabafowethu abangaba ukwenzela ukuthi sibambisane umsebenzi lowo okoBulawayo. IBulawayo yayihlonitshwa nge industry yikho nje silapha sizodinga ukuthi nxa singazuza ama investors sixoxisane sibonisane ukuthi sibambe njani."
Inzalo kaBulawayo eseNgilande imtshele ngobunzima izizalwane zeZimbabwe ezihlala kwamanye amazwe ezidibana labo ekutholeni usizo kungatsha ezitshiyeneyo zikahulumende. UMaNcube uthi uhulumende wakhe usekulungisisa lokho.
"Ukungena kuliwofisi uphume kuleyana ungene kuleyana iwofisi, kwenza abantu benyampe kungakho uMongameli sethe sefuna I One Stop Shop. Umuntu ozangena nje alungiselwe konke aphume ahambe ayoqala umsebenzi. Silokujabula okukhulu kakhulu nje ngemhlangano elungisiweyo sahlangana labantu abanengi. Abanengi bakhona bazimisele kakhulu ukuthi bebuye koBulawayo. Kubahlali bako Bulawayo asisukumeni akulankwali eyaqhwandela enye."
Umnunzana David Smith ngumgcinisihlalo weBritish African Business Alliance( BABA) umanyano wabosomabhizimisi beBhilithane ababona ngezobudlelwano bokuthuthukisa izwekazi leAfrica abayibo abanxuse abedolobho lakoBulawayo.
"Sililunga le Networking Base Business eliseUK, elikhangelelwe ukuthi lingenza umvutho kubantu abasekhaya. Sikhangele ukuthi singenza kanjani ukuze lumvutho wenze udale imisebenzi lokuncedisana kwelasekhaya. Akusonto okuthiwa ijayele ukwenziwa izikhathi zonke nje kumazwe lamazwe kodwa kungumvutho osebantwini abazama ukuwenza ukuze bathuthukise amazwe asekhaya."
Umnunzana Smith ugcizelele ngesizatho sokuthi kungani bekhethe idolobho lakoBulawayo.
"UBulawayo ukuzinga elihle lentuthuko lapho aziwa khona ngembali yomnotho kodwa uyaswela into ezinengi kakhulu. Okunye kwakhona yi investment okunye njalo yi management."
Edolobheni laseBradford umnunzana Wellington Moyo ngomunye wababuthanise izizalwane zakoBulawayo ukuthi zihlangane lomphathintambo walelo dolobho njalo uthi kuhambe kuhle konke.
"Umama uza lapha ngokulandela umkhankaso we Devolution of iBulawayo. Kungathi idivolution which is the main issue ekhona ekhaya. Manje namhlanje uzile lapha uzohlangana lamaZimbabweans ukuthi asethulele lolodaba njalo lokuthi thina esikhatshana esihlala ngapha kuyini esingakwenza ukuthi siphathise abakwethu abasekhaya."
Umnunzana Zwe Reeves obekulumbuthano uthe okumjabulisayo ngokuza kumphathintabho ludaba lwentuthuko yako Ntuthuziyathunqa.
"Okuqakathe kakhulu yikuthi uMinister ubuye ethwele khona okuyikho okuqakathekileyo mayelana ngeBulawayo development. Ifocus kaMinister ingeye Bulawayo and development of Bulawayo. Wonke umuthu obuyileyo lapha abavela koBulawayo izizalwane zakoBulawayo ziyazi ukuthi koBulawayo, kuyini okufunakalayo."
Umpathintambo wakoBulawayo lequla lakhe basese leminye imihlangano labosomabhizinisi beNgilandi njalo bakhangelelwe ukubuyela ekhaya koNdongaziwelene ngemva kokwethekelela lelo lizwe okwensuku ezilitshumi.
