amalinks wokungena

Breaking News

Umqeqetshi weHighlanders Uthi Kuzamele Kudingwe Abanye Abadlali


Highlanders Football Club
Highlanders Football Club

Umqeqetshi weqembu lomdlalo wenguqu ele Highlanders uMandla Mpofu uthi kuzamele adinge abanye abadlali njengoba kulabadlali baleliqembu abambalwa abalimeleyo.

Iqembu le Highlanders libe ngutshiki lobhanqa 1 ka 1 lele Ngezi Platinum emdlalweni walo wakuqala uMpofu ezibambe esidukwini. UMpofu uthethe isikhundla esitshiywe nguMadinda Ndlovu njalo utshele intathelizindaba zemidlalo ekupheleni komdlalo ukuba uzaqhubekela phambili ngenhlelo ebezivele zikhona.

"Kuzamele sithole abadlali abatsha kuyonale iviki ngoba silabadlali abambalwa abangekhoyo ngenxa yezizatho ezitshiyeneyo.
Sizaqhubekela phambili sizama ukuba sidlale ngendlela efunwa liqembu ngoba phela bekungasiyonto eqalwe nguMadinda kodwa lisiko elivele likhona kuqembu le Highlanders."

Iqembu lenguqu ele Highlanders lihlezi endaweni yetshumi lane engalaneni yemiklomelo yePSL njalo lilemiklomelo elitshumi lanhlanu ngemva kokudlala imidlalo elitshumi lantathu.

Phezu kwengalane yemiklomelo kuleqembu le FC Platinum lona elilemiklomelo engamatshumi amabili lesikhombisa njalo elinqobe ele Manica Diamonds nge 1 ka nya. Endaweni yesibili kuleqembu le Chicken Inn lona elilemiklomelo engamatshumi amabili lesithupha njalo elinqobe ele Mushowani Stars nge 3 ka 1. Emsileni wengalane kuhlezi iqembu le Bulawayo Chiefs lona elilemiklomelo eyithoba minwe mbili.

Kolunye udaba olumayelana lomdlalo wenguqu umhlubulo wangezansi yezwekazi lase Africa usuthembele kumaqembu abalisa ele South Africa kanye lele Madagascar ukuba eqhubekele phambili kumncintiswano we Africa Cup of Nations.

Amaqembu lawa afinyelele ukuyadlala kusigaba se quarter – final ngemva kokuba ele South Africa litshaye ele Egypt nge 1 ka nya kuthi ele Madagascar lona linqobe ele Democratic Republic of Congo nge 4 ka 2 ngemva kokutshaywa kwembekwa.

Iqembu le South Africa lizadlala lele Nigeria kusigaba se quarter – final kuthi ele Madagascar lizadlala leqembu elizanqoba phakathi komdlalo ozadlalwa namhla phakathi kwele Ghana lele Tunisia.
Omunye umdlalo ozadlalwa namhla iqembu le Mali lizadibana lele Ivory Coast.

Amanye amaqembu asefinyelele kusigaba se quarter – final ngabalisa ele Senegal kanye lele Benin.

please wait

No media source currently available

0:00 0:01:50 0:00
XS
SM
MD
LG