UMnumzana Themba Mliswa, umsekeli kamqondisi we Affirmative Action Group, ubikwa esefuna ukuthatha inkampani yabamhlophe eye Benbar ese Harare esithi wenza lokhu elandela iziqondiso zomthetho wohlelo lwe indigenization.
U Mliswa ubikwa ebotshwe ngamapholisa aphinde amkhulula sebemethese icala lokwethusela abaqondisi benkampani le.
Abakwaziyo ngokwenzakalayo bathi uMliswa uqalise ukulwisana lenkampani le ngoZibandlela kwathi-ke ngeviki ephelileyo watshela abaqondisi benkampani le ukuthi sokumele baphume baphele ngoba sowathenga amashares athe xaxa kiyo, okwenza ukuthi abe ngumqondisi wayo.
Umnu. Roderick Fayayo ingcwethi ecubungula ezombusazwe utshele uGibbs Dube we Studio 7 ukuthi isenzo sika Mliswa sitshengisa ukuthi abantu abadlelana labakubandla le Zanu PF balakho ukuthatha amankampani abamhlophe santando.
