Umsakazo weZimbabwe Broadcasting Coporation ulokhe utshaya ingoma zeZanu PF lanxa sulaywe lidale leCabinet kabili ukuthi ume ukudlala lezingoma.
Idale leli livumelene kumaviki amabili edluleyo ukuthi ingoma lezi kumele zingadlalwa emoyeni ngoba zixega uzulu kanti njalo zeyisa uhulumende womanyano.
Ngeviki edluleyo iCabinet igcizelele isinqumo sayo lesi, yabopha ukuthi umphathintambo obona ngokwethulwa kwemibiko uMnu Webster Shamu kumele atshele iZBC ukuthi ime ukudlala ingoma lezi. Kodwa lanamuhla lokhu zidlala.
Embikweni awethule ngeviki edluleyo umqondisi weZBC uMnu Happison Muchechetere uthi umsakazo lo uzaqhubeka utshaya ingoma lezi.