Udaba lokucatsha kwemali yesikhwama sezemfundo, iZIMDEF ethiwa yatshaphazwa yiziphathamandla zikahulumende ezibalisa umphathintambo wezemfundo yaphezulu, uMnu. Jonathan Moyo, selutshiye ibandla leZnu PF selimatasalala.
Lokhu kulandela imbiko kaMoyo eyokuthi usezaveza abanye bakhe abatshaphaza imali kahulumende.
Yena uMoyo, ophose wabotshwa ngeviki edluleyo ngokunyamalala kwemali ezinkulungwane ezifika phose amakhulu angamatshumi amane, i$430,000 kalandulanga ukuthi wasebenzisa okungekho emthethweni limali kodwa wazifanisa lomlingiswa othiwa ngu Robin Hood owayeseba imali lempahla yabanothileyo esipha abampofu.
Lokhu kulandela imbiko ethi imali le wayisebenzisa ukuthenga amabhayisikili aphiwa induna labosobhuku.
Ingcwethi kwezombusazwe zithi isehlakalo lesi sikhomba ukungethembeki lokusetshenziswa mahlayana okwenziwa yiziphathamandla zeZanu PF.
Iziphathamandla zogatsha lokuvimba ukuqilibezela olwe Zimbabwe Anti-Corrption Commission zasezilungiselele ukumbopha uMoyo ngeviki edluleyo kodwa ubikwa wasizwa ngumongameli Mugabe.
Kuthi ngoMvulo umsekeli kamongameli, uMnu. Phelekezela Mphoko, onguye osaphethe isikhundla sikamongameli, uthe amapholisa kawalamvumo yokubopha iziphathandla zikahulumende kungelamvumo kamongameli.
UMoyo loMphoko bacatshangelwa ukuthi bakucele linye elithiwa G40 kunhlangothi zeZanu PF ezidonselana amandla. Ukuhlaziya loludaba sixoxe loMnu. Maduma Fuzwayo olwela ilungelo likazulu saqala sambuza ukuthi amazwi kaMoyo okuthi ungu Robin Hood uwezwa njani?
"Ah, kuyethusa ukuthola icomment enje ebantwini esibathembileyo ukuthi yibo abaphethe ilizwe. Ukuthi umuntu uyaphumela egcekeni ukuthi a-justifaye ubusela," kutsho uFuzwayo.
