Umthethwandaba we High Court koBulawayo ngoLwesibili ulahle udaba lokususa esihlalweni uMnu. Gift Banda umgcinisihlalo webandla leMDC-T koBulawayo owetheswa icala lokukhethwa kuleso sikhundla okungekho emthethweni ngomnyaka ka 2013.
Udaba lolu lwakhwezwa emthethwandaba nguMnu. Matson Hlalo owayengu senetha laye ekubandla leMDC-T.
Ibandala leMDC-T lalitshele uHlalo ukuthi esule loludaba emthethwandaba engekela uzaxotsha kodwa yena waqhubeka ngodaba lolu okwabangela ukuthi axotshwe ebandleni.
UHlalo uthi uBanda wakhethwa yena engelasikhathi elilunga lalelibandla njengalokho okufunwa yisisekelo sombuso webandla.
UHlalo utshele umthethwandaba ukuthi imali ebhalwe emabhukwini ukuthi yabhadalwa nguBanda ngomnyaka ka 2004 ikhomba mgceke ukuba wayengakabi lilunga lebandla njalo ilotshwe ngamadola akweleMelika yona limali yayingakaqali ukusetshenziswa.
Sixoxe lowayemela uHlalo kukhetho, uMnu. Swithun Chirowodza ukuze sizwe okunengi ngaloludaba.
“Into kade zikhulunywa ngubaba uHlalo ziliqiniso kodwa akula maphepha asekela lokho kade akukhuluma. Njalo ujudge uthe labo kade ebamangalele balobufakazi obusekelanayo,” kutsho uChirowodza.
Wengezelele esithi ngoLwesine bazakhangelisisa izizatho zikamahluli ezokwethula isinqumo sakhe besebebona ukuthi bazathatha nyathelo bani.
