Idale lomthethwandaba eChipinge ngoLwesibili linike abalimi abamhlophe abathathu ilanga elilodwa lokuthi baphume emapulazini abo kwathi oyedwa wabo wanikwa amalanga angamatshumi amathathu wokuthi aphume kwelakhe.
UMnumzana Deon Theron umqondisi weCommercial Farmers Union uthi abalimi laba sebehambise loludaba emthethwandaba weHigh Court loba nje abantu abacatshangelwa ukuthi ngabalandeli bebandla leZanu PF sebengene emapulazini abo.
Abamhlophe laba sebebalekile emapulazini abo batshiya impahla yabo ibanjwe ngabantu laba.
UMnumzana Kucaca Phulu, umqondisi we Zimbabwe Association for Human Rights (Zimrights) utshele uGibbs Dube weStudio 7 ukuthi abamhlophe laba sebefike komlindi uyacina nxa kukhangelwa ngamapulazi abo.
Kusenjalo, uMnumzana Job Sibanda, ingcwethi kwezemithetho njalo eligqwetha, uthi abamhlophe laba sokumele batshiye impahla yabo yonke njengoba amapulazi abo sethethwe nguhulumende.
U Sibanda uthe abamhlophe laba balakho ukubotshwa nxa bengazama ukukhipha impahla yabo emapulazini la.
