Umthethwandaba uthi kumele kubotshwe uMnu. Dumisani Madzivanyati, owangena Esidakeni Farm, wala ukuphuma ekhitshwa yisithunywa senkantolo.
Umahluleli wedale leHigh Court, uJustice Bongani Ndlovu, wethule lokhu kulandela ukubuyela kuka Madzivanyati epulazini leli elathengwa nguMnu. Siphosami Malunga, uMnu. Charles Moyo loMnu. Zephania Dhlamini.
UJustice Ndlovu uthi amapholisa kumele abophe uMadzvivanyati amvalele entilongweni kuze kulungiswe udaba lweEsidakeni Farm. Ipulazi leli lalisaziwa ngegama elithi Kershelmar Farms Private Limited.
UNdlovu uthi uMadzivanyati ulakho ukwethulela inkantolo izizatho zokwala ukusuka epulazini leli kumbe asuke kuleyo ndawo engakabotshwa.
Kasenelisanga ukukhuluma loMadzivanyati ngodaba lolu ngoba ubengaphenduli umakhalekhukhwini wakhe.
Inkantolo ithi uMadzivanyati kwakumele aphume epulazini lezi kulandela isinqumo esethulwa ngumahluleli, uJustice Evangelista Kabasa, ngoMfumfu lonyaka.
UMalunga ngumtaka muyi uSydney Malunga, owayekubandla lePF Zapu owabhubha emgozini yomgwaqo engaqedakaliyo ngomnyaka ka1994. Wangcwatshwa emathuneni amaqhawe eNational Heroes Acre eHarare.
USiphosami Malunga, osebenza kunhlanganiso yeOpen Society Initiative for Southern African (OSISA), wesatshwa nguhulumende.
Omunye njalo othi wanikwa ingxenye yepulazi lika Malunga labanye bakhe nguMnu. Obert Mpofu, owake waba yisiphathamandla senhlangothi zika hulumende ezigoqela olubona ngezokwenjiwayo lolwendaba zekhaya lezinye.
UMalunga, uMoyo loDhlamini bathenga ipulazi leli kumlungu osehlala kwele Australia.