amalinks wokungena

Breaking News

Mugabe: I-Africa Izimisele Ukulondoloza Ilungelo Labesifazana


South Africa AU Summit

Umhlangano wamalanga ayisitshiyagalolunye wenhlanganiso ye African Union obuqhutshelwa kwele South Africa uphele phakathi kobusuku ngoMvulo.

Emazwini akhe okuvala lumhlangano umgcinisihlalo wenhlanganiso le umongameli Robert Mugabe wethule ukuzimisela kwezwekazi leAfrica ekuthuthukiseni impilo yebesifazana lokuvikela amalungelo abo.

Besekuphakathi kobusuku ngesikhathi kuculwa ihubo lezwekazi leAfrica, kulungiselelwa ukuvala umhlangano we African Union obuseJohannesburg.

Njengobake isihloko somhlangano walonyaka besiphezu kokuthuthukiswa kwabesifazane, enkulumeni yakhe yokuvala lumhlangano umgcinisihlalo weAU umongameli Robert Mugabe ukubeke kwacaca ukuthi inkokheli zeAfrica sesivumelene ukuthi kuqiniswe ukuthuthukiswa kwabomama kwezomnotho lakwezombusazwe.

UMugabe uthi inkokheli zivumelene njalo ukuthi umkhuba wokuhlukuluzwa kwabesifazana lokwendiswa kwamantombazana esesemancane abantu becatsha ngamasiko kumbe ngenkolo ngumkhuba okuzafanele uphele du.

Inkulumo kamongameli Mugabe le yokuzimisela ukuphucula impilo yabesifazana kuzozonke inhlangothi zempilo, isilethe intokozo enkulu kubomama baseAfrica okugoqela labeZimbabwe.

Isizalwane seZimbabwe unkosazana Nomalanga Dlamini ngomunye wabathokoze kakhulu ngokuqakathekiswa kwabesifazana kulo umhlangano.

Umongameli Mugabe uthi kuvunyelwene njalo ukuthi kuqedwe izimpi lemisebenzi yabomalwa becatsha okuyizinto athe sezicithe imiphefumulo eminengi zadudula lezigidi zabantu emizini yabo.

Kulo umhlangano kusungulwe ingxoxo zokuthi kukhitshwe yonke imigoqo eyenza kubenzima ukuthi amazwe eAfrica athengiselane.

Inkulumo yokuthi umongameli Mugabe usekhulile njalo sekufanele aphumule ibinyenyezwa ngabanengi kulo umhlangano njengoba ubehamba nzima kanti lekukhulumeni bekuzwakala ukuthi amandla asemalutshwane.

Lokhu kubuye kwavela njalo emhlanganweni wabezindaba lapho abesekhulumela khona phansi kakhulu, ake athule isikhathi eside okuzimpawu zokuthi usekhulile umuntu omdala.

Loba kunjalo uthole isibongo esikhulu ngokukhokhela lumhlangano waze wafika emaphethelweni.

XS
SM
MD
LG