UMongameli Mugabe uthi kasekeli udaba lombuso wezabelo esithi lulakho ukwehlukanisa abantu beZimbabwe, ikakhulu ngemihlobo.
Kungxoxo ayenze lomsakazo weZBC ngeSonto, uMongameli Mugabe uthe iZimbabwe lilizwe elincane kakhulu ukuthi livumele umbuso wezabelo.
AbeMDC, iZapu labenhlanganiso ezizimeleyo bathi bafuna udaba lolu lungene kusisekelo sombuso esitsha ukuze kuqedwe udubo lokusalela muva kwezinye izabelo kwezentuthuko.
Ibandla leZanu PF lona likhanya lidabukene phezu kwaloludaba.
Ebhala kuphephandaba leSunday Mail, ummeli weTsholotsho edale lephalamende njalo elilunga leZanu PF politburo uMnu Jonathan Moyo uthe udaba lombuso wezabelo, iDevolution ngesingisi, ludaba oluhle kakhulu.
Kodwa uMoyo usole abanye athi bakhanya besebenzisa loludaba ukugcwalisa izifiso zabo ze-Federalism, okuyinto ehlukene kakhulu leDevolution.
Omunye wabagcinisihlalo beCopac uMnu Douglas Mwonzora uthi ekuthapheni imbono kazulu okwenziwayo, phakathi kwezabelo ezilitshumi lambili, ezilitshumi zithi ziyalusekela udaba lombuso wezabelo.
Isikhulumeli seZapu uMnu Methuseli Moyo lengcwethi ecubungula ezombusazwe uMnu George Mkhwanzi basole uMugabe ngamazwi akhe.
