amalinks wokungena

UMugabe Ususa uMnangagwa, uChinamasa Labanye Ezikhundleni Zabo


UMongameli Mugabe uhlele kakutsha idale labaphathintambo bakhe ngoMvulo waxotshwa umsekeli wakhe uMnu Emmerson Mnangagwa esikhundleni sokuba ngumphathintambo wezemithetho.

Obengumqondisi wogatsha lwabacuphi olweCIO uMnu Happyton Bonyongwe nguye osethethe isikhundla sikaMnangagwa.

UMnangagwa yena uzaqhubeka engumsekeli kaMugabe – okwamanje!

Embikweni awethule ngoMvulo, uMugabe wazise ukuthi sesuse njalo umphathintambo wezemali uMnu Patrick Chinamasa wamusa kugatsha olutsha olweCyber Security.

UMnu Ignatias Chombo, obengumphathintambo wendaba zasekhaya, nguye osengumphathintambo wezemali.

Obengumphathintambo wogatsha lokuhlelwa kuhle kwezenotho uMnu Obert Mpofu nguye osengumphathintambo wendaba zasekhaya.

Isikhulumeli sebandla leZanu PF uMnu Simon Khaya Moyo nguye osengumphathintambo obona ngokwethulwa kwembiko.

UKhaya uthethe ugatsha lolu kuMnu Christopher Mushowe yena osengumphathintambo obona ngezemfundo ehofisinika Mugabe.

Obengumphathintambo obona ngobudlelwano beZimbabwe lamanye amazwe uMnu Samuel Mumbwengegwi ukhitshiwe kulolugatsha waphiwa olokuhlelwa komnotho.

UMnu Walter Mzembi, obengumphathintambo obona ngezokwethekelelwa kwelizwe nguye osebona ngobudlelwano beZimbabwe lamanye amazwe.

Abaphathintambo abalahlekelwe yizihlalo zabo kuCabinet bagoqela yena uMnangagwa, uNkosikazi Prsicar Mupfumira, yena obebona ngezezisebenzi kanye loMnu Tshinga Dube.

UDube ubekhokhela ugatsha olubona ngendaba zabalwa impi yenkululeko. Lolugatsha solukhokhelwa nguMnu Cain Mathema.

Ingcwethi zithi ukususwa kukaMnangagwa kuCabinet labantu abakucele elifuna abe nguMongameli eleTeam Lacoste kukhomba sobala ukuthi ulakho ukuxotshwa esikhundleni sokuba ngumsekeli kaMugabe.

Kulokulwisana okukhulu phakathi kwecele likaMnangagwa leleG40 lona elilamalunga agoqela uNkosikazi Grace Mugabe kubangwa isikhundla sikaMugabe.

Facebook Forum

XS
SM
MD
LG