amalinks wokungena

Breaking News

Uhulumende Uyekethisa Imithetho Yokungena Kwabantwana eSouth Africa


Abadlula emgceleni weZimbabwe lele South Africa.
Abadlula emgceleni weZimbabwe lele South Africa.

Uhulumende weSouth Africa useyekethise imithetho yokungena kwabantwana elizweni lelo ngesikhathi kukhangelelwe ukukhuphuka kwenani lezethekeli ngekhefu leKhisimusi.

Inguqukole yomthetho wokungena kwabantwana kwele South Africa equkethwe phansi kogwalo lukahulumende, igovernment gazette, phansi kwesihloko esithi ‘Draft First Amendment of the Immigration Regulation, 2014 made under the Immigration Act” iqalile ukusebenza mhlaka 1 Mpalakazi.

Phansi kwale inguquko abahamba labantwana abavela emazweni afana leZimbabwe lapho okungadingeki khona ama VISA abasabanjwa ngamandla ukuthi bathwale ama affidavit avela ebazalini.

Ngokomthetho obusebenza kweleSouth Africa, umuntu ohamba lomntwana ongasiwakhe, ubebanjwa ngamandla ukuthwala iAffidavit ebhalwe ngabazali bomntwana besitsho ukuthi bamphile imvumo yokuhamba lomntanabo.

Nxa kungumzali oyedwa ohamba lomntwana laye ubebanjwa ngamandla ukuthi aphathe i affidavit yomunye umzali eqinisekisa ukuthi bavumelene ukuthi umtwana ahambe.

Leyindaba ezathinta abantu abanengi njengoba nyakenye ngekhefu lekhisimusi kuphe kulezizalwane zeZimbabwe ezedlula izinkulungwane ezingamakhulu ayisikhombisa (700000) ezethekelele kwele South Africa.

Isifundiswa seZimbabwe, uMnu. Bongani Nyathi, uthi umthetho obukhona ubuthwalisa nzima abazali abanengi.

Utholukuthi abazali bomntwana abekho ndawonye, utholukuthi wena ungubaba womntwana umama akekho selehlukana noma ungumama womntwana ubaba akekho selehlukana, kuba nzimake ukudlula lalowo mntwana eborder ngoba uzathola ukuthi kufuneka incwadi eyemvumo yokuthi ubaba uthe uhambe lomntwana.”

Loba kunjalo uhulumende ukhuthaza abahamba labantwana abangasibo babo ukuthi babuphathe ubufakazi bokuthi balemvumo yokuhamba labo ukuze nxa bungafuneka babuveze.

Lezi yindaba ezinhle kakhulu ikakhulu kuzizalwane zeZimbabwe ezizabe zisebenza ngekhisimusi kodwa zifisa ukwethekelelwa ngabantwabazo khonala eMzansi.

Kodwake umqondisi wenhlanganiso ye Phoenix Foundation of Zimbabwe, uMnu. Dumisani Nleya, uthi akavumelani lenyathelo likahulumende leli.

“Mina ngiyakugxeka kakhulu ngoba sekuzakwenza ukuthi abazali batshontshelane abantwana njalo kuzakwenza ukuthi izigebenga zintshontshe abantwana.”

UMnu. Greatman Mkhwebu laye uthi umthetho omutsha lo uyingozi.

“Ma bekuvulela kanje kuzodala inkinga ngokuthi sizabona abantu abanengi bengena labantwana especially omalayitsha bengena labo okuzoletha ipressure futhi eSouth Africa yet kusakhalwa ngokuthi sizothathisa abantwana ama birthcertificate lapha. So, umthetho awube ngumthetho uqinenje uhlale unjalo ungatshintshi. Amadocument lawo afunekayo vele awahlale efuneka.”

UMnu. Lebani Nkomazana uthi kuzadingeka ezinye indlela ezizaqinisekisa ukuthi abantwana abatshontsheki lula.

“Ububi balendaba kulamanye amazwe ezizalwane ezihlala lapha eSouth Africa abaza ngobugangi abazoqeda abantwana ngendaba le. Kutsho ukuthi kuzamela kube lestrong verbal interview emaborder lapha lobufakazi obeneleyo mpela ukubana indaba yokutshontsha abantwana ingaqhubekeli phambili.”

Kusenjalo, ugatsha lwendaba zasekhaya selukhuthaze zonke izethekeli ezizangena lokuphuma kwele South Africa ngaleli khefu leKhisimusi ukuthi ziqinisekise ukuthi amaphasipoti azo alungile, ukuthi amaphepha okuchaphisa izimota alungile kanye lokuthola invumo yalokho abazabe bekuphethe okudinga imvumo.

Ngekhefu leKhisimusi yomnyaka ophelileyo kulezizalwane zeZimbabwe ezedlula izinkulungwane ezingamakhulu ayisikhombisa.

Abantu Sebelemvumo Yokungena Lokhuphuma eSouth Africa Labantwana Bengelamaphepha Aveza Isomo Sabo
please wait

No media source currently available

0:00 0:03:45 0:00

XS
SM
MD
LG