Ekuqhubekeni kombango wesikhundla sikaNduna Khayisa Ndiweni, umkhosi wokugcotshwa kwendodana yakhe yokucina uMnu. Nhlanhla Ndiweni obekwesuliwe kuqhubekele phambili ngoLwesihlanu lanxa abanye abemuli yakoNdiweni, abagoqela abafowabo bakaNhlanhla abangavumelani lokuthi agcotshwe ukuba yinduna bebengekho.
Izibulo likamuyi uMnu. Joram Ndiweni ukhweze emthethwandaba waphezulu isicelo sokuthi kwesulwe ukugcotshwa komfowabo ukuthi athathe isikhundla sikayise owabhubha ngomyaka ka 2010, ngoba kunguye osifaneleyo nxa kulandelwa amasiko esintu njengoba eyingqabutho.
UNhlanhla, ohlala eNgilandi, ubikwa ubesanda kufika elizweni, ukuthi azothatha lesi sikhundla.
Umfelokazi kamuyi, uNkosikazi Agnes Ndiweni ubikwa esithi umkakhe wakhetha uNhlanhla ngoba embona efanele ukukhokhela abantu nxa eqathaniswa lomnewabo olesimo esingakhwabithekiyo, njalo lokhu kwakuyisifiso somkakhe owasikhuluma engakabhubhi.
Kodwa uJoram uthi uhulumende kalandelanga isiko lamaNguni ngokugcoba umnawakhe,njalo kuyikuthi kasifanelanga lesisikhundla, eyakhe ingqabutho uMnu. Mhlambezi Ndiweni, nguye okufanele abe yinduna.
Ezinye ingcwethi kwezamasiko zisekela ingqabutho kamuyi, kodwa ezinye zithi amasiko ayaguqulwa nxa kudingeka.
Ingcwethi kwezamasiko uMnu. Kucaca Phulu usichasisela ukuthi umthethwandaba ungaluphatha njani loludaba.
