Umkhokheli webandla ele Zimbabwe People First, uNkosikazi Joyce Mujuru ucele uxolo ngokuthuka akwenza umuyi uMnumzana Joshua Nkomo emhlanganweni weRally webandla lakhe owenzelwe, eStanley Square koBulawayo ngoMgqibelo, wathi, yebo ubekubandla leZanu PF okweminyaka kodwa uze lamhla ukuzathi mayuyu lokuzokwakha kutsha ilizwe.
UMujuru uthe uze ukuzokwakha ilizwe njalo inkethabetshabi emulini yakhe ayikho ngoba umnewabo ethethe eMaNdebeleni, kuthi indodakazi yakhe ithethwe eSpain, eyinye eManicaland, omunye umzukulu wakhe ethethwe eMasvingo.
Uzame ukuchasisa udaba lokuthuka kwakhe umuyi uDokotela Joshua Nkomo waxolisa ngalokho wathi ezombusazwe labezindaba balakho ukukhulisa indaba ezincane zibe yinkalakatha zendaba.
Waphatha indaba ezithize ezigoqela ukunyamalala kwemali yamadayimana i$15billion ethi ngabe ayinyamalalanga izigaba zelizwe ezilitshumi bezizathola US$1.9m kanye lobunzima obadalwa ngumbhuqazwe weGukurahundi.
Ibandla lePeople Democratic Party lithumele iqula ebelikhokhelwa ngunobhala jikelele walo, umnumzana Gorden Moyo ukuzosekela iZPF. UMoyo uthi baze ukuzosekela uMujuru ngoba ebanxusile njalo ethe uyafisa ukusebenza labo.
Thina abe PDP size lapha ukuba ngofakazi ukuthi ngempela ngempela the iron lady the courageous lady, ungabona umuntu esehla phezu kwempisi that person is strong yikho sibuye lapha mama, uthe esizalapha usitshelile wathi uyafisa ukusebenzxa labanye ukwakha ilizwe leZimbabwe.
Abalwa impi yenkululeko labo bathi bayamsekela uMujuru. UMnumzana Christopher Ndiweni obona ngezokulondolozwa kokuthula lezomvikela kuZPF uthi loba yena labanye balwa impi yokukhulula uzulu embusweni woncindezelo, ulusizi ngoba obusayo eselocuku ukwedlula abamhlophe.
UNkosikazi Mujuru siyamsekela njalo besimthanda ngoba ebesiza abantwini ngcono kuloMugabe ngakho sezwa ubuhlungu ngokuxotshwa kwakhe. Siyamsekela ngoba liqhawe njengathi. Njengabalweli benkululeko salwa ukuze sikhulule abantu hatshi lokhu esikubonayo. Sifuna ukwakha ilizwe.
Inkulungwane lenkulungwane zabantu baze ukuzosekela uMujuru, kunye labasuke eSouth Africa lapho umongameli weZPF athe uyadana ngendlela izizalwane zeZimbabwe eziphila ngakhona eGoli.
UMujuru ucine ngokukhuthaza abantu ukuthi babambane bakhe ilizwe njalo wathi uyawusekela umbuso wezigaba ofunwa ngabantu beMandebeleni iDevolution of Power.
