amalinks wokungena

Breaking News

UNorman Mapeza Wehlulekile Ukusebenzisa Kuhle Abadlali: Kutsho Abalandeli Benguqu


Zimbabwe Warriors

Abaqeqetshi beqembu labesilisa elimela ilizwe emdlalweni wenguqu bakhuthazwa ukuba balungisise amaphutha abawenze ngoMgqibelo ukuze iqembu lama Warriors linqobe ele Ghana emdlalweni wangoLwesibili.

Iqembu le Zimbabwe linqotshwe nge 3 ka 1 ngele Ghana ngoMgqibelo owedluleyo njalo inengi labalandeli bomdlalo wenguqu bakhale ngokuba umqeqetshi uNorman Mapeza labasekeli bakhe behluleke ukusebenzisa kuhle abadlali.

Osakhulayo uButholezwe Ndlovu uthi iqembu leZimbabwe linganqoba nxa kungalungisiswa ukumiswa kwabadlali enkundleni.

“Ama Warriors kumele balungisise emuva badlalise uMunetsi lo Teenage Hadebe lasesandleni sokudla kumele kulungisiswe ngoba uDarikwa wenza iphutha sahlohlwa.

Phakathi laphakathi kwenkundla akulamdlali oyenza izinto zenzeke kodwa phambili ngibona angathi uMusona lo Knox bazabambisana kuhle.

Emuva yikho lapho okumele kulungiswe kudlale uMunetsi lo Hadebe,” kutsho uNdlovu.

NgoMgqibelo abaqeqetshi beqembu lama Warriors bamangalise uzulu ngendlela abamise ngayo abadlali enkundleni kanye lokutshiya phandle abakwenze uTeenage Hadebe yena odlala mihla yonke kuqembu lakhe elizweni lase United States of America waze wangena umdlalo ususiyaphela.

Iqembu le Zimbabwe lihlezi emsileni wengalane yemiklomelo yesibaya sika Group G lilomklomelo owodwa eliwuthole lize libe ngutshiki lobhanqa 0 ka 0 leqembu le Bafana Bafana elase South Africa.

Emdlalweni walo wesibili linqotshwe nge 1 ka nya ngele Ethiopia okuyimpumela edale ukuba umqeqetshi oyisizalwane selizwe lase Croatia uZdravko Logarusic axotshwe umsebenzi.

Isikhundla sikamqeqetshi siphiwe uNorman Mapeza yena obezibambe esidukwini ngoMgqibelo lapho umdlalo ophele iqembu le Zimbabwe linqotshwe ngele Ghana nge 3 ka 1.

Kusele imidlalo emithathu kugoqela lowakusasa okumele iqembu lama Warriors liyidlale kumkhankaso walo owokudinga amaqembu azakuyadlala kumidlalo yezizwe zomhlaba ezaqhutshelwa elizweni le Qatar ngomnyaka ozayo njalo kumele linqobe kuyo yonke yomithathu ukuze liyale lilokhu lilethuba elokudlulela kusigaba esilandelayo esomncintiswano.

Sikhangele umdlalo kakhilikithi................

Iqembu labesifazane elimela ilizwe le Zimbabwe emdlalweni kakhilikithi linqotshwe ngama runs angamatshumi ayithoba minwe mbili lanhlanu emdlalweni wesine njalo ungowokucina kumncintiswano we One Day International ebeliwudlala lele Ireland.

Limpumela itsho ukuba iqembu le Ireland linqobe ele Zimbabwe nge 3 ka 1 ngemva kokuba ele Zimbabwe linqobe emdlalweni wakuqala kwathi ele Ireland lanqoba kwemithathu elandele lapho.

Iqembu le Ireland yilo eliqale ukutshaya ibhola labuthelela ama runs angamakhulu amathathu letshumi lambili lilahlekelwe ngabadlali abathathu (312/3).

Kuthe iqembu le Zimbabwe seliphendula laphelelwa ngumphako selenelise ama runs angamakhulu amabili lamatshumi amabili lesikhombisa lilahlekelwe ngabadlali abayithoba minwe mbili (227/8).

Facebook Forum

XS
SM
MD
LG