amalinks wokungena

Breaking News

Uqhubekela Phambili Umbango weSicoco sePremier Soccer League


Castle Lager Premier Soccer League

Imidlalo yenguqu eyesigaba se Castle Lager Premier Soccer League ingena kuviki lesimatshumi mathathu lambili kulimpelaviki njalo amaqembu alwisa ukuphakamisa isicoco salonyaka kuzamele abophe ziqine ngoba ebhekane lemidlalo enzima kakhulu.

NgoMgqibelo iqembu elihlezi endaweni yesibili engalaneni yemiklomelo ele Chicken Inn lizavakatshela ele Bulawayo Chiefs enkundleni ye Luveve njalo lumdlalo ukhangelelwe ngabanengi abalandela umdlalo wenguqu ngenxa yokunyonkolozana okuhlala kusenziwa yilawa maqembu ebulenjini be Twitter.

Phezu kwalokho iqembu leBulawayo Chiefs livele lisesimeni esibi engalaneni yemiklomelo njengoba lihlezi endaweni yesine nxa usuka emsileni, okutsho ukuba kumele linqobe ukuze lithuthukise amathuba okusinda ekugunyulweni kusigaba saphezulu ekupheleni kwesizini.

Ngakwelinye icele iqembu le Chicken Inn, lona elilemiklomelo engamatshumi amahlanu lantathu, lalo kumele linqobe ukuze lithuthukise amathuba alo okuphakamisa inkezo ye PSL.

Komunye umdlalo ozadlalwa kusasa iqembu le Harare City lizadibana lele Yadah enkundleni ye Rufaro. Lawamaqembu alwisa ukusinda ekugunyulweni kusigaba saphezulu njengoba iqembu le Harare City lihlezi endaweni yetshumi lambili lilemiklomelo engamatshumi amathathu lesikhombisa kuthi ele Yadah lihlezi endaweni yesibili nxa usuka emsileni lilemiklomelo engamatshumi amathathu lambili.

Imidlalo iqhubekela phambili ngeSonto lapho iqembu le Highlanders lona elihlezi endaweni yethoba minwe mbili elizangqikilana khona lele Manica Diamonds elihlezi endaweni yethoba munwe munye.

Umqeqetshi weqembu le Highlanders uHendrik Pieter de Jongh uthe lumdlalo kawusoze ube lula ngoba lawa maqembu ayehlukaniswe ngumklomelo owodwa engalaneni.

“Silemiklomelo engamatshumi amane lambili ikanti bona balemiklomelo engamatshumi amane lowodwa yikho ke lumdlalo kawusoze ubelula ngoba iqembu le Manica Diamonds liqembu eliqinileyo njalo elilabadlali abadlala kuhle.

Sizabe singekhaya thina okutsho ukuba sizabe silosekelo lwabalandeli njalo sizazama ukuba sithole yomithathu imiklomelo,” kutsho u de Jong.

Kweminye imidlalo yengeSonto iqembu elihlezi phezu kwengalane ele CAPS United, lona elitshiya ele Chicken Inn ngemiklomelo emibili, lizadibana lele Dynamos enkundleni ye National Sports Stadium.

Iqembu le Chapungu lizemukela intshantshu zanyakenye iqembu le FC Platinum, lona elihlezi endaweni yesithathu engalaneni, ngase Ascot Stadium.

NgeSonto njalo iqembu le Black Rhinos lizadlala lele Ngezi Platinum Stars ngase Rufaro, iqembu le Mushowani Stars lizadlala lele Telone ngase Trojan Mine, iqembu le Hwange lizadlala lele Herentals ngase Colliery kuthi iqembu le Triangle lizadibana lele ZPC Kariba ngase Gibbo.

Kusenjalo, ekupheleni kwalimpelaviki kuzabe sekusaziwa ukuba yiwaphi amaqembu azabe edlala kusigaba se PSL evela kusigaba sika Division One ngomnyaka ozayo njengoba imidlalo ifika komlindi uyacina kuzigaba ezibalisa ele Southern Region, ese Eastern Region kanye laku Central Region.

Kusigaba se Northern Region iqembu lebutho le Zimbabwe ele Cranborne Bullets yilo elithole lelilungelo ikanti ku Southern Region umbango uphakathi kweqembu le Bulawayo City lele Talen Vision.

Kusigaba se Eastern Region umbango uphakathi kweqembu le Tenax kanye lele Buffaloes kuthi kuCentral Region umbango uphakathi kweqembu le Sheasham lele Hwahwa.

Udaba lwezemidlalo siluphiwa nguJoseph Njanji
please wait

No media source currently available

0:00 0:02:48 0:00

Facebook Forum

XS
SM
MD
LG