amalinks wokungena

Breaking News

Usefikile Umqeqetshi Omutsha Weqembu leHighlanders.


U Mark Harrison-Umqeqetshi omutsha weqembu leHighlanders

Umqeqetshi omutsha oweqembu le Bosso, uMark Harrison, yena ofike koBulawayo ngoLwesihlanu emini, utshele intathelizindaba ukuba iqembu le Highlanders yilo iqembu elikhulu kwele Zimbabwe loba nje lilesikhathi eside lingaphakamisi isicoco seligi.

Uqhubekele phambili wathi yena iqembu le Highlanders lilabalandeli abanengi njalo kuyisifiso sikamqeqetshi wonke ukuba akhokhele iqembu elibukelwa yizibukeli ezigcwele inkundla yikho ehle wavumela phezulu ngesikhathi iziphathamandla zeqembu leli zixhumana laye.

Akusikho kwakuqala ukuba uHarrison asebenzele kwele Zimbabwe njengoba eke waqeqetsha amaqembu abalisa ele CAPS United kanye lele Harare City njalo uthe yena injongo yakhe ngeyokuqeda umbuso weqembu le FC Platinum lona eselibe zintshanthu kusigaba se Castle Lager Premier Soccer League iminyaka emithathu ilandelana.

“Sebephakamise isicoco okweminyaka emithathu ilandelana njalo sekumele sibethule esiqongweni lapho abahlezi khona. Umkhulu umsebenzi esibhekane lawo njalo angitsho ukuthi sizanqoba kodwa yiyo ingqondo okumele sibe layo eyokuthi sidlalela ukuba sinqobe nxa sifuna ukuphumelela.

Okusalayo ngilokuthokoza lokuzimisela okukhulu njalo ngivele ngizimisele ukuphumelela,” kutsho uHarrison.

UHarrison uthatha isikhundla esitshiywe ngumqeqetshi oyisizalwane selizwe lase Holland uHendrikus Pieter de Jong yena osengumqeqetshi weqembu le FC Platinum.

UMandla Mpofu lo Bekithemba Ndlovu yibo abasekeli baka Harrison kusithi umqeqetshi wabonozinti nguJulius Ndlovu.

UHarrison utshele intathelizindaba zemidlalo ukuba into eyokuqala azayenza yikuba lomhlangano labasekeli bakhe bakhangele ukuba isimo sabadlali simi njani njalo uthe isifiso sakhe yikuba babe labadlali abezinga laphezulu abanengi ukuze benelise ukutshaya eziwayo lonyaka.

Lumqeqetshi ulandule imibiko ethi ubefuna ukuletha owayengumsekeli wakhe kuqembu le CAPS United lele Harare City uMark Mathe wathi uMathe uqhatshwe ngelinye iqembu njalo yena akalansolo labasekeli abathole bevele bekhona kuqembu leBosso.

UHarrison yisizalwane seNgilandi njalo wadlalela amaqembu akhonale abalisa ele Port Vale kanye lele Stoke City engunozinti.

Uqeqetshe okweminyaka eminengi eselizweni lase South Africa ikanti uke wasebenza njalo amazweni abalisa ele Botswana kanye lele Bangladesh.

please wait

No media source currently available

0:00 0:02:14 0:00


Facebook Forum

XS
SM
MD
LG