Iqembu lomdlalo wenguqu ele FC Platinum lethule uHendrikus Pieter de Jongh njengomqeqetshi walo omutsha, ngoMvulo.
Iqembu le FC Platinum lona elike lalandula laze lemba phansi lisithi kalimqhatshanga u de Jongh limethule kuzulu ndawonye lomqeqetshi wabonozinti uTembo Chuma yena obesebenzela iqembu le TelOne lona eligunyulwe kusigaba saphezulu ekupheleni kwemidlalo yanyakenye.
Laye uChuma uke wasebenzela iqembu le Highlanders nyakenye wasetshiya phakathi komnyaka esesiya kuqembu le TelOne.
Ude Jongh utshele intathelizindaba zemidlalo ukuba isizatho sakhe esokuba engaqhubekeli phambili esebenzela iqembu le Highlanders yikuba ufuna ukuncintisa kuzinga eliphezulu.
“Ngithethe isinqumo esokuba ngingalobelani isivumelwano esomsebenzi esitsha leqembu le Highlanders ngoba njengomqeqetshi ngilesifiso esokusebenza ezingeni laphezulu njalo ngokubona kwami lelothuba ngizalithola lapha kuqembu le FC Platinum hatshi kweyinye indawo,” kutsho u de Jongh.
Umqeqetshi u de Jongh ufike kwele Zimbabwe nyakenye ngenyanga kaMpandula lapho afike ezothatha isikhundla ebesitshiywe ngu Madinda Ndlovu kuqembu le Highlanders.
Lumqeqetshi wenelise ukuba aphakamise inkezo yeChibuku leqembu le Highlanders waphinda Malo walikhuphula elisusa engozini eyokugunyulwa kusigaba saphezulu laphutsha imidlalo yanyakenye lisendaweni yesithupha engalaneni yemiklomelo.
Iqembu le FC Platinum kalizange liveze ukuba u de Jongh uphiwe isivumelwano esomsebenzi eseminyaka emingaki kodwa basiki bebunda bathi ngeseminyaka emihlanu.
Kuke kwaba lamahunga hunga athi kulabadlali beqembu le Highlanders asebengalandela lumqeqetshi kuqembu le FC Platinum ngesikhathi kuvela udaba olokuba useqhatshwe liqembu leli kodwa yena ukulandule lokhu ikanti lenkokheli zeqembu le Highlanders zithi akulamdlali olesivumelwano leqembu ozadedelwa ukuba ahambe.
Iqembu le FC Platinum lizadibana leqembu le Al Ahly elakwele Egypt ngoMgqibelo ozayo kumncintiswano we Total CAF Champions League.
U de Jongh ubhekane lomsebenzi omkhulu kabi ngoba iqembu lakhe elitsha lihlezi emsileni wengalane yemiklomelo kusibaya sika Group B lingela ngitsho lowodwa umklomelo ngemva kwemidlalo emithathu.
