Usewutshiyile ngempela umsebenzi obengumqeqetshi weqembu lomdlalo wenguqu ele Highlanders, uMadinda Ndlovu.
Isikhulumeli seqembu leHighlanders, uRonald Moyo, ugcizelele umbiko owethulwe ngumgcinisihlalo weqembu leHighlanders, uKenneth Mhlophe, othi uMadinda usetshiye isikhundla esokuba ngumqeqetshi weqembu leBosso.
“Siyabonga kakhulu umsebenzi omkhulu owenziwe nguMadinda kusukela eqala umsebenzi nyakenye. Sikhangelele ukuba loluhlelo alutshiyileyo luzaqhubeka kuhle. Sicela ukuba abalandeli bangethuki ngoba iqembu lisele ezandleni ezinhle kakhulu. Simfisela inhlanhla enhle kakhulu lapho ayakhona.”
UMadinda uzakuma ukusebenzela iqembu leHighlanders mhla zingamatshumi amathathu kuyonale inyanga kaNhlangula
Lokhu kuza ngemva kokuba kuke kwabalamahunga hunga athi umfoka Ndlovu uselubhekise kwele Botswana ukuyaqeqetsha iqembu leGaborone United, okuyinto yena ngokwakhe umfoka Ndlovu abecatsha ngomunwe nxa ebuzwa ngayo.
UMadinda uphenduke kuqembu leHighlanders ekuqaleni kwanyakenye njalo ubelobelane laleliqembu isivumelwano esomsebenzi eseminyaka emithathu.