USithandile Khoza, owadlalela iqembu lenguqu eleHighlanders Royals, uthi sekulengqubela phambili enguqwini yabesifazane.
USithandile ongumnawakhe womdlali owaduma kakhulu ngensuku ezadluleyo uSiza Khoza, uthi umdlalo wenguqu wabesifazane usuthuthuke kakhulu nxa eqathanisa lesikhathi yena esadlala.
“Khathesi sekulengqubela phambili enkulu ngoba thina kudala sasidlala sodwa kulumhlubulo owezansi yelizwe kuthi labasenyakatho labo bedlala bodwa kodwa khathesi sekule premier league ebholeni labomama. Labadlali khathesi sebethola usekelo lwemali ikanti thina besingatholi lutho, besisenza okokuyaguqa kubosomabizimusi sicela uncedo ukuze sithenge amakawuso awokugqoka nxa sesidlala.”
USithandile uqale ukudlala ibhola kuqembu leWest Swallows eleMagwegwe West. Ungene kuqembu leHighlanders Royals ngomnyaka ka1996 njalo udlalele lona waze watshiya ukudlala ngo2008.
Udlale waze waba yingxenye yeqembu labesifazane elimela isizwe emdlalweni wenguqu njalo uthi lokhu ukwenze ngoba ethola usekelo oluvela kwabangakibo.
“Emulini yethu kwakumnandi kakhulu ngoba ubaba wethu wayesisekela kakhulu ukuba sidlale ibhola. Kwaba lula kakhulu ukuba ngidlale ibhola ngoba umfowethu uSiza nguye owangithengela lezicathulo zokukhaba ibhola lami ngacaca phakathi kwabanye abantwana. Lasemphakathini esikhulele kuwo abantu babezigqaja ngathi ePumula laphana ikanti lomama ekhaya laye samenza wangani uyaphucuka lapho akhona.”
UMorrison, omunye umfowabo kaSithandile, laye uke wadlalela iqembu leHighlanders kanye leqembu labafana abaleminyaka engaphansi kwelitshumi lesikhombisa elimela ilizwe. USithandile yena ubeyingxenye yeqembu lamaMighty Warriors eliphatheke kumncintiswano weAfrica Women’s Championship laphutsha lisendaweni yesine ngomnyaka ka2000 kwele South Africa.
“Ngiqalise ukudlalela iqembu leMighty Warriors ngo1998 kodwa asizange sidlale lamanye amazwe kwaze kwaba ngu2000 lapho esiphatheke khona kumncintiswano wokudinga intshantshu zezwekazi leAfrica owesibili oqhutshelwe kwele South Africa. Siqale saphatheka kuma qualifier aqhutshelwe esigodlweni iHarare lapho okwakulamazwe abalisa eleZambia, Lesotho kanye leTanzania. Sanqoba thina safinyelela ukuyadlala eSouth Africa.”
Kuqembu lesizwe lel, uSithandile udlale ndawonye labadlali abagoqela uChristine Mpanza, uRuth Banda, uNomsa ‘Boyz’ Moyo, uSithethelelwe ‘Kwinji 15’ Sibanda, uEnnie Konje, uYesmore Mutero, uSithandekile Mathobela kanye labanye.
Uqhubekele phambili wathi usedlulisela ulwazi aluthole esadlala kubadlali abasakhulayo abaqeqetshayo.
“Sengingumsekeli kamqeqetshi weqembu leHighlanders Royals. Sengisipha abantwana ulwazi olokuthi labo bekhanye njengalokhu lami engakwenzayo. Angikatholi ithuba elokuthi lami ngenze izifundo zaboCAF A kodwa isifiso sami ngesokuthi lami mhlawumbe ngizithole sengingumqeqetshi weqembu lamankazana aleminyaka engaphansi kwelitshumi lesikhombisa elimela ilizwe.”
USithandile usekela uAdmore Sibanda kuqembu leHighlanders Royals lona elidlala kuZimbabwe Women’s Premier League.
Forum