Uhulumende uthi indizamtshina ezine sezithwalele ukudla lemithi abantu beSkyline eChimanimani, kulandela izulu lesiphepho esigabeni seManicaland, elibulele abantu abalikhulu lamatshumi amathathu lasitshiyagalolunye-139 njalo ladiliza amabholoho, imigwaqo, lezindlu.
Ugatsha olubona ngokwethulwa kwembiko kuhulumende luthi eyinye yalezi indizamtshina, eyenkampani ye Mars, ihambise impahla esibhedlela seNgangu leseMutambara Mission Hospital.
Abagulayo bathwalelwe eChipinge District Hospital le Chimanimani Rural Hospital lapho abelatshwa khona, njalo kulemota zokuthwala abagulayo ezama ambulances ezine eziphathisa kulumsebenzi.
Uhulumende uthi okuhluphayo yikuthi akulamanzi edolobheni leChimanimani kanye leChipinge ngenxa yalumonakalo.
Uncedo lwempahla ezivela eTanzania lubikwa lufikile namuhla eManyame Airbase, njalo isigodlo seChina eZimbabwe laso sinikeze impahla.
Omunye wabaqoqa uncedo koBulawayo, uMnu. David Coltart uthi imota enkulu ethwele impahla ezitshiyeneyo isisukile kulelidolobho ilubhekise eChimanimani.
Umongameli Emmerson Mnangagwa ubeseChimanimani izolo, lapho athembise abantu ukuthi bazathola ukudla lemithi eyokubasiza.
Izimota kanye lendizamtshina bezingafinyeleli kwezinye indawo ngoba amabholoho edabukile kumbe egcwele amanzi, kulandela lelizulu, kodwa uhlupho lolu lubikwa solungcono kwezinye indawo.
Ukhansila Thamsanqa Gilbert Hadebe weDzivarasekwa engowebandla leMDC usichasisela imizamo eyenziwa yikhansili yakhe ukuphathisa abantu eManicaland.
