Umnikazi we Shabanie Mashaba Mines uMnu. Mutumwa Mawere ubikwa ekwele Zimbabwe lapho ahlangana khona labaphathintambo bakahulumende emizameni yakhe yokuthi abiselwe amankampani akhe athathwa nguhulumende ngomnyaka ka 2004.
Abazi ngokwenzakalayo bathi okwamanje uMnu. Mawere sehlangane lomphathintambo wezemigodi uMnu. Obert Mpofu, omunye wabaphathintambo ababona ngokwenzakala phakathi kwelizwe uMnu. Kembo Mohadi kanye leziphathamandla zogatsha lwezemithetho.
Bathi loba nje imhlangano labaphathintambo laba itshengisa ukuthi uMnu. Mawere ulakho ukubiselwa amankampani akhe, iziphathamandla zogatsha lwezemthetho zibikwa zalile ukufaka izithembiso eziqinileyo zokuthi kungabanjwa impahla yakhe ngomthetho we Reconstruction of State-indebted and Insolvent Companies Act.
Ingcwethi kwezemthetho yamankampani uMnu. Matshobana Ncube utshele uGibbs Dube we Studio 7 ukuthi njengoba uMawere engasadingwa ngamapholisa, kumele abiselwe amankampani akhe.
Usomabhizimusi Olodumo Ubuyela eZimbabwe Elanda Amankampani Akhe Athathwa Nguhulumende
- Gibbs Dube
